Elbasy Úkimet quramyna ózgeris engizýdi usyndy

Búgin Jalpyulttyq telekópir barysynda QR Prezıdenti Nursultan Nazarbaev saýdany elimizdiń Syrtqy ister mınıstrligine berýdi usyndy. «Bireýler eksportpen aınalysýy tıis. Úkimet saýda qaıda, ınvestısııa qaıda bolýy kerektigin aıqyndaýy tıis. Munymen kim aınalysady? Múmkin Syrtqy ister mınıstrligi Avstralııa, Kanada jáne basqa da elderdegideı Syrtqy ister jáne saýda mınıstrligi bolýy kerek shyǵar. Al Indýstrııa mınıstrligi ındýstrııamen aınalysýy qajet qoı. Eger ınnovasııa bolsa, onda ınnovasııamen. Árkim óz isimen aınalysýy qajet. Áıtpese, is ónbeıdi. Biz ózimizdiń óte mańyzdy jumysymyzdy úzip almaýǵa tıispiz», – dedi Elbasy. Bul rette Qazaqstan Prezıdenti qarjylandyrý máselesi de asa mańyzdy ekendigine toqtaldy. Halyqaralyq tájirıbe qarjylandyrý bolmaǵan jaǵdaıda barynsha minsiz jasalǵan strategııanyń ózi is ónbeıtindigin kórsetkendigin basa aıtty. «Biz ındýstrıalandyrýdy qoldaýǵa baǵyttalǵan resýrstardy jyl saıyn ulǵaıtyp otyrýǵa tıis ekendigimizdi atap ótken oryndy. Máselen, agrarlyq sektor bıýdjet shyǵystarynyń 4,5 paıyz qoldaýyn ala otyryp el JIО́-ge nebári 5 paıyz beredi. Kólik pen kommýnıkasııalar 8,3 paıyz beredi, turǵyn úı-kommýnaldyq sharýashylyq 6,8 paıyz bıýdjetti shyǵyndaıdy. Al bul oraıda el JIО́-niń 16 paıyzyn beretin ónerkásip pen qurylys bıýdjet shyǵystarynyń 0,6 paıyzyna ǵana qarjylandyrylady», – dedi Nazarbaev.