Tehnıka ózimizde shyǵarylsa ıgi

Qazaqstandyq «SemAZ» máshıne qu­rastyrý kásiporny ózi jumys istegen kúnnen bastap 1500-den astam «Belarýs» traktoryn quras­ty­ryp shy­ǵar­dy. Bul elimizde aýylsharýa­shylyq tehnıka­laryn shyǵarýdy qarjylan­dyrý­dyń nátıjesinde júzege asyp otyr. «QazAgroQarjy» kompanııasy 2009 jyly aýylsharýashylyq tehnıkalaryn qu­rastyrý óndirisin uıymdastyrý baǵytyn­da quny 1,03 mlrd.teńge turatyn ınvestı­sııalyq jobany qarjylandyrǵan bolatyn. Al jobanyń jal­py quny 1,2 mlrd.teńge. Budan ózge lızıngtik kompanııa otandyq óndirýshilerge qoldaý jasaý aıasynda «SemAZdan» Qazaqstan­nyń sharýashy­lyqtary men agroqurylymdaryna keıin lızıngke tabystaý úshin onyń ónimderin satyp alady. Satyp alynatyn tehnıka kólemi otandyq iri jer ıelenýshilerdiń múddeleri men suranysyna baılanysty bolmaq. 2009 jyldyń naýryz aıynan bastap «Qaz­AgroQarjy» Semeıdiń máshıne quras­ty­rýshylarynan barlyǵy 873 birlik «Belarýs» traktoryn satyp alǵan bolatyn. Al bıylǵy jyldyń basynan bastap, «SemAZdan» jalpy somasy 1,6 mlrd. teńgege 462 traktor, sondaı-­aq 118 mln.teńgege 64 pishen taılaǵysh satyp aldy. Elbasy Soltústik Qazaqstan oblysyna bar­ǵan  saparynda el aýmaǵynda aýylsha­rýa­­shy­lyq tehnıkalaryn shyǵarý men quras­tyra­tyn kásiporyndar qurý qajettigin aıtyp ót­ken bolatyn. Eger biz sheteldik tehnıkalardy satyp ala otyryp, olardy Qazaqstanda quras­tyrýǵa mindettesek, quny 30% arzanǵa túsedi. 2000 jyldan bastap «QazAgroQarjy» el agrarlyq sektoryna 160 mlrd. teńgeden astam qarjyǵa 18 myń birlikke jýyq aýylsharýa­shylyq tehnıka­la­ryn satyp alyp, tabys etti. Sharýa­lardyń qalaýy boıynsha, otandyq óndi­ris tehnıkalary jáne jabdyqtarymen qatar alys­-jaqyn sheteldik óndiristen de satylyp alynady. Alaıda otandyq lızıngtik kompanııa ótinishterdi qaraý kezinde otandyq tehnıka­larǵa basymdyq beredi. Olardy jeńildikpen satyp alýǵa talaptar da qarjylandyrylady. Búginde kompanııanyń aldynda turǵan basty mindetterdiń biri – Qazaqstanda tehnıka shyǵarýdy uıymdastyrý. Osy maqsat­ta kompanııa ınvestısııalyq jobalardy iske asyrý aıasynda jylyna 6 %­-ben eki jyl jeńildikti óteý kezeńimen qarajat qaras­tyryp otyr. Indýstrııa jáne jańa tehnologııalar mı­nıstrliginiń derekterine sáıkes, Qazaq­stannyń aýylsharýashylyq máshınelerin jasaý óndiri­sine 120 kásiporyn jumyl­dyrylǵan.  Onyń 50­-inde ártúrli topyraq óńdeý quraldary (qop­syt­qyshtar, sydyra jyrtqyshtar, soqa­lar, tyrmalar), sonymen qatar destelegishter men tuqymsepkishter shyǵarý óndirisi retke keltirilgen. Budan ózge, jem­shóp daıyndaýǵa arnal­ǵan tehnıkalar, ósimdikterdi qorǵaýǵa arnal­ǵan máshıneler jáne aýylsharýashylyq maq­sat­tarǵa arnalǵan basqa da qural­-jab­dyqtar, olardyń qosalqy bólshekterin birge shyǵa­rady. Al 15-ke jýyq kásiporyn túpki ónim óndirýshi bolyp sanalady. Sonymen qatar, «AgromashHoldıng» AQ Qostanaı qalasynda «Esil» astyq jınaý kombaındaryn shyǵarý boıynsha qolda­nystaǵy óndiristik qýatty ulǵaıtpaqshy. Venera TÚGELBAI.