Qyzmet kórsetý jetildirilmek

Turǵyndarǵa memlekettik qyz­met kórsetý zaman talabyna saı jetildirilip, jańartylý ús­tinde ekeni qazir kópshilikke jaq­sy tanys. Anyqtamalar, qu­jattar  alý úshin burynǵydaı aptalap kútý, kúnuzaqqa kezekte turýdyń ýaqyty ótip bara jat­qandyǵy málim. Bul baǵyttaǵy jumys sapasyn odan ári jaq­sartý, oryndalý merzimin jyl­damdatýǵa arnalǵan is-sharalar túrleri jyldan-jylǵa ulǵaıyp ta keledi. Osy oraıda ozyq tájirbıelerdi qoldanýǵa úlken kóńil bólinýde. Máselen, Grýzııa­da avtokólikterdi tirkeý, júrgizýshilik kýálikter berý sa­naýly mınýttarda atqarylady eken. Mundaı úrdis taıaý arada elimiz boıynsha alǵash ret Qa­raǵandy qalasynda júzege asy­rylǵaly otyr. Keshe Ishki ister, Baılanys jáne aqparat mınıstrleri  Qal­muhambet Qasymov pen Asqar Jumaǵalıevtiń qatysýymen ót­ken keńeste ony iske engizý máseleleri talqylandy. Soǵan baılanysty joba  oblys qol­daýymen atqarylady. Bul kúnde avtokólikterdi tirkeý, júr­gizý­shi­lik kýálikter berý, sondaı-aq,  basqa da qyzmetterdi sapaly ári jedel oryndaıtyn arnaýly or­ta­lyq qurylysy aıaqtalyp qaldy. Mınıstrler keńesten keıin jańa ortalyqtyń salyný barysymen tanysty. Aıqyn NESIPBAI, Qaraǵandy.