«Biz álemdik stýdııalardyń ónimderin qazaq tiline kóbirek beıimdeýge nıettimiz. Bul rette tek stýdııalardyń ǵana emes, sonymen qatar kitap baspalarynyń ónimderin qazaqshalaýǵa mán berýdemiz. Mysaly, Djoan Roýlıngtiń jańa kitabyn qazaq tilinde basyp shyǵarýdy armandaımyn. Eger de onyń Garrı Potter nemese basqa da jobalary bir mezgilde qazaq, orys jáne aǵylshyn tilderinde basylyp jatsa, bul óz kezeginde úlken oqıǵa bolady dep sanaımyn», dedi V. Golenko.
Osy turǵyda ol tıisti kitaptardy basqa tilderde qaıta basyp shyǵarýǵa ruqsatty baspalardan satyp alynsa, al Garrı Potter týraly serııalardy basý quqyqtaryn tikeleı Djoan Roýlıngten alý kerektigin túsindirdi. Bul baǵytta kelissózderdiń ózine uzaq ýaqyt jumsalatyn kórinedi.
«Árıne, bul máseleni Roýlıng hanymmen talqylasaq, onyń bizge senýi úshin qyzyqtyra túsýimiz kerek. О́zderińiz bilesizder, onyń kitaptary mıllıondaǵan danamen basylyp jatyr. Sondyqtan da biz qandaı da bir dálelderdi keltirýimiz qajet. Osy oraıda múmkin «Bolashaq» qaýymdastyǵymen birlese otyryp, Roýlıngke onyń týyndylary Ula Dalanyń eń kóne tilderiniń birinde basylatynyn túsindirgen jón bolar. Bul rette ol bizge senim artyp, óz ruqsatyn berýi yqtımal», dep oıymen bólisti «Meloman» basshysy.
Sonymen qatar, ol qazirgi kezde kompanııa birqatar sheteldik avtorlardyń týyndylaryn qazaq tiline aýdarýǵa kelissózder júrgizip jatqandyǵyn aıtty.
«Búginde Fransııada basylǵan avtorlardyń kitaptaryn qazaq tilinde shyǵarý úshin fransýz baspasymen kelissózder júrgizýdemiz. Osy rásimder aıtarlyqtaı kóp ýaqytty alady», dedi Vadım Golenko.
Aıta keteıik, Djoan Roýlıngtiń jas sıqyrshy Garrı Poter jaıyndaǵy kitaptary birneshe marapatqa ıe bolyp, 400 mıllıonnan astam danamen satyldy.
