Mereıtoıly dataǵa oraı Ádebıet jáne óner ınstıtýty, Qazaqstan Jazýshylar odaǵy, Músilim Bazarbaev atyndaǵy №38 gımnazııanyń uıymdastyrýymen «Músilim Bazarbaev murasy jáne ulttyq qundylyqtar» atty respýblıkalyq ǵylymı-teorııalyq konferensııa ótti. Qazaq zııaly qaýymynyń basyn qosqan iri jıynǵa Qazaqstannyń halyq jazýshysy Ábdijámil Nurpeıisov, UǴA akademıgi Serik Qırabaev, Syrtqy ister mınıstriniń birinshi orynbasary Muhtar Tileýberdi, Qazaqstan Jazýshylar odaǵynyń tóraǵasy Nurlan Orazalın, A.Baıtursynov atyndaǵy Til bilimi ınstıtýtynyń dırektory Erden Qajybek, M.Áýezov atyndaǵy ádebıet jáne óner ınstıtýtynyń dırektory Ýálıhan Qalıjan, Ál-Farabı atyndaǵy QazUÝ rektorynyń keńesshisi, aqyn, jýrnalıst Baýyrjan Jaqyp jáne Músilim Bazarbaevtyń jary, fılologııa ǵylymdarynyń kandıdaty Gúlbarash Baıtoǵaeva qatysty. Professor Músilim Bazarbaevtyń qoǵamdyq eńbegi, ulttyq ǵylymǵa qosqan ólsheýsiz úlesi jaıynda keńinen sóz qozǵalyp, molynan estelik aıtylǵan konferensııa ǵalymnyń ómiri men murasyn zertteýdiń jańa bir dáýiriniń shymyldyǵyn túrdi deýge bolady.
Konferensııa barysynda «Qazaq ýnıversıteti» baspa úıi shyǵaryp otyrǵan «О́negeli ómir» serııasy boıynsha Músilim Bazarbaevqa arnalǵan kitaptyń tusaýkeseri boldy. Sondaı-aq, jınalǵan qaýym ǵalymnyń ómiri men shyǵarmashylyǵyna arnalǵan beınerolıkti tamashalady.
Almas NÚSIP,
«Egemen Qazaqstan»
ALMATY
