Osyǵan oraı shymkenttik talantty ánshi Maqsat Aıtjanov «EKSPO» ánin jazǵan eken. Qazaqtyń jeztańdaı ánshileriniń biri Roza Rymbaeva aıryqsha qadirleıtin, ónerin baǵalap, týǵan inisindeı jaqyn tartatyn Maqsat Aıtjanov «bul án júrek qalaýymen jazyldy», deıdi. «Elimizdiń keshegi tarıhyn jaqsy bilemiz. HIH ǵasyrdyń sońynda 8 mıllıonǵa jetken qazaq ártúrli zulmattyń, qoldan uıymdastyrylǵan ashtyq, repressııa saldarynan jýsap qaldy. Halyqtyń jartysy qyrǵyn taýyp, 1 mıllıonǵa jýyǵy bas saýǵalap shet elge ótti. Osylaı rýhy janshylǵan eldiń eńsesin kóterý úshin eńseli ister kerek. Memleketimizdiń bedelimen alynǵan EKSPO-2017 halyqaralyq kórmesi – elimizdiń, elim degen Elbasymyzdyń jeńisi. Osynyń bári jigerlendirip, osynaý ándi týdyrdy». Bul án oblysta ótken mádenıet qyzmetkerleriniń kúninde 2017 adamdyq hordyń aıtýymen oryndaldy.
Endi osy án EKSPO-2017 kórmesinde Ońtústik Qazaqstan oblysynyń kúnderi ótkende oryndalmaq. Oǵan oblystan 610 adamnan quralǵan 17 shyǵarmashylyq top qatysady.
«Mádenı shara barysynda «Qazynaly Ońtústik» qolóner sheberleri men sýretshilerdiń kórmesi, konserttik baǵdarlamalar, ońtústikte túsirilgen anımasııalyq fılmder men kórkem fılmder kórsetiledi. Sondaı-aq, J.Shanın atyndaǵy oblystyq akademııalyq qazaq drama jáne orys drama, qýyrshaq, ázil-syqaq jáne satıra teatrlary men Ońtústik-Sırktiń qoıylymdary tórt taraptan kelgen jurtshylyqtyń nazaryna usynylady.
Baqtııar Taıjan,
«Egemen Qazaqstan»
Ońtústik Qazaqstan oblysy
