Jýyrda ıirimi tereń ınternetti paraqtap otyryp, álemdegi eń bıik týtuǵyrlardyń reıtıngin kózim shalyp qaldy. Ony jarııalaýshy «Sputnik» saıty. San eldiń tý baılaǵan tuǵyryn salystyrǵan atalmysh saıt bizdiń baıraǵymyzdyń bıik ornalasý reıtıngin toǵyzynshy dep baǵalapty. Endi myna sáıkestikke súısinbeı kórińiz: terrıtorııasynyń aýqymy boıynsha álemde toǵyzynshy oryndy ıelenetin Qazaqstan bul reıtıngte de týra sol ornyna turaqtapty. Kóńilimiz ósip, keýdemiz kóterilip qaldy. Rasynda da, elordamyz Astananyń qaq tórindegi 111 metrlik týtuǵyrdan jelbiregen kók baıraǵymyz qalanyń qaı qyrynan da menmundalap kózge shalynatyndaı bıik emes pe?!
Al álgiler túzgen reıtıngtegi kóshtiń basyn 171 metrlik tuǵyrǵa tý tikken Saýd Arabııasynyń Jıdda shahary bastaıdy. Dál sodan keıingi oryndy Dýshanbedegi 165 metrlik Tájikstannyń bas baıraǵy ıemdenipti. Úshtikti túıindeý Ázerbaıjannyń Baký qalasyna buıyrǵan sııaqty. Mundaǵy týdyń bıiktigi – 162 metr. Odan keıingi orynǵa KHDR-diń Kıdjondon qalasy jaıǵasqan. Bul eldiń alyp týy 160 metrlik deńgeıde. Joǵarydaǵy tizimdi odan ármen Túrikmenstannyń Ashhabady jalǵaıdy. Bul eldiń bas baıraǵy 133 metr bıiktikten jelbireıdi eken. Tipti, bir-birinen asyryp, qos-qostan týtuǵyr qoıǵan memleketter de tabyldy. Máselen, 2003 jyly Iordanııanyń astanasy Amman qalasy úshin 128,5 metrlik flagshtok arnaıy jasalǵan. Al keıinnen osy eldiń Akaba shaharynda odan da bıik tý paıda boldy. Onyń bıiktigi 136 metrdi qurady. Taǵy bir memlekettiń bas týy 122 metrlik deńgeıde ornalasypty. Bul Birikken Arab Ámirlikteriniń Ábý-Dabı shahary bolatyn.
Mine, saıt túzgen tizim osylaı tizbektelip kete barady. Toǵyzynshyǵa turaqty jaıǵasqan Qazaqstannan keıingi oryndardy Malaızııa, taǵy da Túrikmenstannyń Avaza qalasy, Qyrǵyzstan, Belarýs, Ýkraına, Brazılııa memleketteri ózara bólisti. Bir eskeretini, negizinen bul reıtıng Azııa men Shyǵys Eýropa elderin ǵana qamtyǵan sııaqty. Al AQSh pen Eýropa jurty bul talastan tysqary qalǵandaı kórindi.
Amangeldi QIIаS,
«Egemen Qazaqstan»
