Ulttyń rýhyn kóteretin, halyqtyń sanasyn serpiltetin qundy qujat jarııalanǵan kúnnen bastap qoǵamda qyzý talqylaý týdyrdy. Elbasy aıtqan eń basty murat – enshimizdegi rýhanı en baılyqty ıgerý arqyly jańǵyrý jolyna túsý bolyp tabylady. Yqylym zamannan syr tartatyn kóne jazbalar, mádenı muralar da rýhanı jańǵyrýymyzdyń negizi bolmaq.
Memleket basshysy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasyn nasıhattaý maqsatynda Qazaqstannyń eńbek sińirgen qaıratkeri, jazýshy Kádirbek Segizbaev, Halyqaralyq «Alash» ádebı syılyǵynyń ıegeri, aqyn Hanbıbi Esenǵaraeva jáne Qazaqstan Respýblıkasy Memlekettik syılyǵynyń laýreaty, aqyn Ulyqbek Esdáýlet Jambyl jerine kelip, jurtshylyqpen júzdesti.
.jpg)
Qalamgerler áýeli Jambyl, Jýaly jáne Baızaq aýdandarynda bolyp, jergilikti turǵyndarmen kezdesti. Elbasy maqalasynda aıtylǵan ózekti máseleler tóńireginde oı qozǵaǵan aqyn-jazýshylar óńir turǵyndarynyń saýaldaryna da jaýap berdi. Budan keıin Taraz qalalyq mádenıet úıinde qorytyndy jıyn ótip, onda Elbasynyń baǵdarlamalyq maqalasy keńinen talqylandy. Minber bıiginen sóz alǵan Kádirbek Segizbaıuly til taǵdyry tóńireginde áńgime qozǵap, jastardy, ásirese, tildi qurmetteýge, tildi buzyp sóılemeýge shaqyrdy. Sondaı-aq, jazýshy jyl ótken saıyn sóıleý mádenıetimizdiń jutańdanyp bara jatqanyn da aıtyp ótti. «Kóp jastar qazir durys sóıleı almaıdy. Jáne jazý mádenıeti men máneri de jas jazýshylar men jýrnalısterdiń únemi esinde bolýy kerek», dedi jazýshy.
Al Hanbıbi Esenǵaraeva qazaqtyń taǵdyry men latyn álipbıin ushtastyryp, áserli áńgime órbitti. Áńgime barysynda óziniń ádebıetke kelý jolyn, týyndylarynyń tarıhyn da oqyrmanǵa baıandap berdi. «Bala kúnimizde gazet-jýrnaldardy latyn álipbıinde oqı beretin edik. Latyn álipbıine kóshý – mańyzyn joǵaltpaıtyn másele. Elbasynyń osy oıdy der kezinde qozǵap, qoǵamǵa qozǵaý salǵanyn da aıtyp ótken jón», dep, jınalǵan kópshilikke aqyn retinde óleń oqyp berdi. Sondaı-aq, Ulyqbek Esdáýlet baǵdarlamalyq maqalanyń tutas mazmunyn qamtyǵan rýhanı jańǵyrý jóninde oı qozǵaı kelip, qazaqtyń kórnekti aqyn-jazýshylarynyń tańdaýly shyǵarmalaryn álemniń eń ozyq tilderine aýdarý qajettigine toqtaldy. Ásirese, jas qalamgerlerdiń shyǵarmalaryn shet tilderge aýdarý máselesi ózekti ekenin jetkizdi. «Taraz jeri ejelden aqyndardyń mekeni. Sol úrdis búginde de úzilgen joq. Tarazda Nesipbek Dáýtaıuly bastaǵan talantty qalamger azamattar bar. Jas aqyndar da bar. Endi sol kórnekti qalamgerler men jastardy shet tilderge aýdarý máselesin sheshken durys. Osy máseleni Jambyl oblysynyń ákimi qolǵa alsa durys bolar edi», degen usynysyn da aıtty. Budan keıin óleń oqyp, kópshilik tilegin qanaǵattandyrdy.
Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan dúnıelerdiń bári de ulttyń bolashaǵyna kerek. Al sanaly adamnyń únemi bilimin jetildirip, ózin ózi rýhanı turǵyda shyńdaı beretinin eskersek, atalǵan maqalanyń mańyzdylyǵyn odan ári tereń túsinýge bolady. Ádebı tulǵalarmen kezdesýde halyq maqalada aıtylǵan oılardyń asa ózekti ekenin jetkizip, Almaty jáne Shymkent qalalarynan arnaıy kelgen qalamgerlerge alǵysyn bildirdi.
Hamıt Esaman,
«Egemen Qazaqstan»
Jambyl oblysy
