Elorda ákimdiginde ótken press-konferensııa barysynda resmı tirkelgen taksılerdiń BusLane jolaqtarymen júrý quqyqtary túsindirildi. Jolaýshylar tasymaldaý jáne joljúkteri erejesine saı tasymaldaý qyzmetterin kórsetetin kompanııalar Astana qalasynyń jolaýshylar kóligi basqarmasymen kelisim shartqa otyrýlary tıis. Sodan keıin kólik quraldarynyń tirkelgeni týraly maǵlumat arnaıy jolaqtarmen qatynaý quqyǵyna ıe avtomobılderdiń reestrine qosý úshin ákimshilik polısııa basqarmasyna jiberiledi. Búgingi kúni qaladaǵy 13 taksomatorly kompanııa atalǵan prosedýradan ótti.
- «Astana taksı» jalpy qalalyq tańbasy quryldy. Biz ózimizge taksomotorly kompanııalar men kólik qyzmetkerlerin shaqyrdyq: jumystyń alǵashqy kezinde bizge 7 kompanııa qosylsa, qazir olardyń sany 13. Jalpy avtomobılderdiń sany – 414, taǵy 60 kólik rásimdelý ústinde. Ereksheleıtin belgilerdiń eskızderi daıyndaldy. Sol sebepten, «TAXI» belgisin jabystyryp alǵan jeke menshikter BusLane jolaqtarymen qatynaı almaıdy, - dep túsindirdi «Astana qalasy jolaýshylar kóligi basqarmasy» MM basshysy Bekmyrza Igenberdınov.
Jol júrý erejesin buzǵandar men qoǵamdyq kólikterge arnalǵan arnaıy jolaqtarmen qatynaǵandar úshin 11 345 teńge, qaıtalalanǵan jaǵdaıda – 10 AEK (22 690 teńge) aıyppul kózdelgen.
- Jaqyn arada qalada quqyqbuzýshylyqty tirkep otyratyn 3000-ǵa jýyq beınebaqylaý kameralary ornatylady. Barlyq quqyqbuzýshylyqtar avtomatty túrde tirkelip, basqarmanyń ákimshilik praktıka boıynsha prosessıngtik ortalyǵyna jiberilip otyrady, - dedi Astana qalasy IID ákimshilik polısııa basqarmasy basshysynyń orynbasary Nurlan Uzaev.
