Q. Toqaev «Bolashaqtyń energııasy» dep atalatyn kórmeniń taqyryby BUU-nyń ornyqty damý maqsattaryna tolyǵymen sáıkes keletinin atap ótti. Tóraǵa BUU men oǵan múshe memleketter «EKSPO-2017» kórmesine qatysa otyryp, jahandyq klımattyń ózgerý problemasyn sheshýge qomaqty úles qosatynyna senim bildirdi.
Tóraǵa Qazaqstannyń halyqaralyq qoǵamdastyqqa tabysty yqpaldasýy men ıadrolyq qarý synaqtaryna tyıym salý jáne ıadrolyq qarýdy taratpaý tártibin nyǵaıtý jónindegi bizdiń elimizdiń ustanymdaryna BUU tarapynan qoldaý kórsetilgenin atap ótti. «Prezıdent N.Nazarbaevtyń Semeı ıadrolyq polıgonyn jabý týraly Jarlyǵyna qol qoıylǵan kún – 29 tamyz – Iаdrolyq synaqtarǵa qarsy is-qımyldyń halyqaralyq kúni retinde BUU-da atap ótiledi», - dedi Senat Tóraǵasy.
Q.Toqaev 2030 jylǵa deıingi kezeńdegi ornyqty damý salasyndaǵy BUU-nyń jańa kún tártibin ilgeriletýdegi jáne klımattyń ózgerýi máselelerin sheshýdegi Qazaqstannyń úlesine toqtaldy. Ol bizdiń elimizde «Jasyl kópir» áriptestigi baǵdarlamasy iske asyrylyp jatqanyn, «jasyl» ekonomıkaǵa kóshý jónindegi tujyrymdama ulttyq deńgeıde qabyldanǵanyn atap ótti.
BUU-men ózara is-qımyldyń keleshegine qatysty aıtar bolsaq, ol Qazaqstannyń Qaýipsizdik keńesine turaqty emes múshesi retindegi ókilettigin iske asyrýǵa baǵyttalyp otyr. «Bizdiń kúsh-jigerimiz ıadrolyq qarýdan azat aımaqqa qol jetkizýge, halyqaralyq terrorızm jáne zorlyqshyl ekstremızmmen kúreske, jahandyq soǵys qateriniń aldyn alýǵa, Eýropa men Amerıka, Azııa men Afrıkanyń ujymdyq qaýipsizdigi jónindegi aımaqtyq uıymdarynyń báriniń arasyndaǵy yntymaqtastyqty keńeıtýge arnalyp otyr», - dedi Tóraǵa.
Q.Toqaev BUU aıasynda aldaǵy ýaqytta Astanada ashylatyn «jasyl» tehnologııalardy damytý ınvestısııalyq jobalardyń halyqaralyq ortalyǵyna da nazar aýdardy. Ortalyqty ornalastyrý úshin EKSPO pavılondarynyń bir bóligin paıdalaný kózdelip otyr.
Saltanatqa qatysýshylar halyqaralyq kórmedegi BUU kúnine arnalǵan BUU Bas hatshysy Antonıý Gýterrıshtiń beınejazbadaǵy úndeýin tamashalady.
Shara barysynda BUU Bas hatshysynyń kómekshisi, BUU-nyń Eýropa jáne TMD elderi jónindegi Damý baǵdarlamasy aımaqtyq bıýrosynyń dırektory Djıhan Sýltanoglý men Birikken Ulttar Uıymynyń ónerkásipti damytý jónindegi (IýNIDO) bas dırektory Lı Iong te sóz aldy.
Q. Toqaev «EKSPO-2017» halyqaralyq kórmesin aralaý aıasynda qazaqstandyq «Nur Álem» pavılonyna qoıylǵan jobalarmen tanysty.
