Aýdanǵa elimizdegi Bolgarııa Respýblıkasy Elshiliginiń Konsýly Mıtko Hrıstov jáne elshiliktiń mádenıet jónindegi keńesshisi Bochvarova Galına, etno-mádenı birlestikter, Reseı, Germanııadan, Aqtobe, Taldyqorǵannan kelgen bolgar jurtynyń ókilderi qatysty.
Bessarabııa men Ýkraına bolgarlarynyń qazaq jerine qonystanǵan altynshy urpaǵy qazir elimizde turyp, ómir súrýde. Jınalǵan jurtshylyq halyqtar birliginiń damýyna úles qosqan Qazaqstan halqy Assambleıasy tóraǵasynyń burynǵy orynbasary Oleg Dymovty eske aldy.
Aýdan ákimi Abylaı Ámirın aýdandaǵy Razýmovka, Andrıanovka aýyldaryna sol jyldary kelgen bolgardyń urpaǵy turyp jatqanyn, aýyl ataýlarynyń ótken kúnderden qalǵan estelik ekenin aıtyp ótti.
«Qazir oblysta 1000-ǵa jýyq bolgar etnosynyń ókili, al Aqtoǵaı aýdanynda 200-den astam bolgarlar turady. Olar mysaly, elimizdiń, aýyl, aýdanymyzdyń damýyna úlesterin qosqan Dymovtar, Fýchıjı, Tetıklı, Draganovtar, Serovtar, Baklajanskııler, Sokoly, Vıtkovtar, Mıhovtar, Stoıanovtar, Kısenko, Todorovtar, Galıýroevter, Stanchelovtar, Iýsımbelıler áýletteriniń esimderi óńirimizde jaqsy tanymal», dedi A. Ámirın.
2002 jyly oblys ortalyǵynda oblystyq «Slavıane» bolgar etnomádenı birlestigi quryldy. Etnomádenı birlestiktiń tóraǵasy Shatova Valentınanyń aıtýynsha, ortalyqta bolgar tili men mádenıetin úırenýge barlyq jaǵdaılar jasalǵan. Jyl saıyn mektep túlekteri Bolgarııa joǵarǵy oqý oryndaryna túsýde bolgar tilinen joǵary baǵa alyp Sofııa, Varny, Blagoevgrad qalalaryndaǵy joǵary oqý oryndaryna túsip, oqýlaryn jalǵastyrýda.
Shara konserttik baǵdarlamamen jalǵasty. Konsert «Týǵan jer» ánimen bastaldy. Baǵdarlamada «Rosna kıdka», «Bıala roza» jáne «Lazarkı» shyǵarmashylyq ujymdary, sondaı-aq Andrıanovka aýylynyń ónerpazdary óner kórsetti.
Farıda BYQAI,
«Egemen Qazaqstan»
Sýretterdi túsirgen: Maqsat Aıtbaev
