«Astana EKSPO-2017» halyqaralyq mamandandyrylǵan kórmesi alańynda álemniń 115 memleketi men 22 bedeldi halyqaralyq uıymynyń jalaýy jelbirep tur. Osy aıtýly halyqaralyq uıymnyń ishindegi biri de biregeıi Birikken Ulttar Uıymy ekendigi daýsyz. Keshe jahandyq kórme baǵdarlamasy aıasynda BUU kúni saltanatty jaǵdaıda ashyldy.
«Astana EKSPO-2017» halyqaralyq mamandandyrylǵan kórmesi alańynda álemniń 115 memleketi men 22 bedeldi halyqaralyq uıymynyń jalaýy jelbirep tur. Osy aıtýly halyqaralyq uıymnyń ishindegi biri de biregeıi Birikken Ulttar Uıymy ekendigi daýsyz. Keshe jahandyq kórme baǵdarlamasy aıasynda BUU kúni saltanatty jaǵdaıda ashyldy.
– Biz búgin asa mańyzdy da úlken oqıǵanyń kýási bolyp otyrmyz. Elordamyz Astanada ótip jatqan EKSPO-2017 halyqaralyq kórmesi shyn mánindegi álemdik oqıǵaǵa aınaldy. Onyń bir kýási retinde biz Birikken Ulttar Uıymy kúniniń ashylý saltanatyna qatysyp otyrmyz. Aqıqatynda Qazaqstan úshin BUU – balamasy joq biregeı uıym. Sondyqtan, Qazaqstan BUU-men yntymaqtastyqty barynsha arttyrý maqsatyna basymdyq berip keldi, aldaǵy ýaqytta da ony damytý úshin barlyq kúsh-jigerimizdi jumsaıtyn bolamyz, – dedi BUU kúniniń ashylý saltanatyna arnalǵan alqaly jıynda alǵash sóz alǵan Qazaqstan Respýblıkasy Parlamenti Senatynyń Tóraǵasy Qasym-Jomart Toqaev.
«Astana EKSPO-2017» halyqaralyq mamandandyrylǵan kórmesindegi BUU-nyń Bas komıssary Jıhan Sultanoǵly álemdik uıymnyń atynan «Bolashaqtyń energııasy» uranymen búkilálemdik kórme ótkizip otyrǵan Qazaqstanǵa shynaıy alǵysyn jetkizdi. «Birikken Ulttar Uıymy Qazaqstan Úkimetine, kórmeni uıymdastyrýshylarǵa, barlyq qazaqstandyqtarǵa jáne Astana qalasynyń turǵyndaryna EKSPO halyqaralyq kórmesin ótkizgeni úshin jáne oǵan qatysýǵa BUU-ny shaqyrǵany úshin sheksiz rızashylyǵyn bildiredi. Sizderdi osy úlken jobalaryńyzdy júzege asyrýlaryńyzben quttyqtaımyn!», − dedi ol óz sózinde.
Bas komıssardyń aıtýy boıynsha, EKSPO-2017 kórmesiniń bas taqyryby – «Bolashaqtyń energııasy» BUU-nyń azyq-túlik qaýipsizdigin qamtamasyz etýdegi, áıelderdiń múmkindikteri men quqyqtaryn keńeıtýdegi bastamalarymen, energetıka, turaqty damý salasynda atqaryp jatqan sharalarymen jáne klımattyń ózgerýine qarsy qabyldanǵan baǵdarlamalarymen tyǵyz úndestik taýyp otyrǵan kórinedi. «Elektr jaryǵy eshqashan óshpeıtin qolaıly úılerde turatyn turǵyndar úshin álemde 1,3 mlrd adamnyń áli kúnge deıin elektr energııasyn paıdalana almaı otyrǵandyǵyn túsiný qıyn. Bul adamdardyń nege qoly jetpeı otyrǵandyǵyn oılap kórińizdershi? Kóptegen bala tamaq pisirý úshin otyn daıyndaý barysynda mektepke barý múmkindiginen aıyrylǵan. Mıllıondaǵan eginshi sýarmaly egistiktiń jumysyn jandandyratyn elektr energııasynyń joqtyǵynan qýańshylyq zardabyn shegip otyr», dedi odan ári Jıhan Sultanoǵly.
Bas komıssar jınalǵan jurtty EKSPO-2017 qalashyǵyndaǵy halyqaralyq uıymdar pavılonynda ornalasqan BUU jádigerlerimen tanysýǵa shaqyrdy. BUU jádigerleri halyqaralyq uıymdar pavılonyndaǵy aýqymdy alańdy alyp jatyr. Munda jahandyq jylyný úrdisiniń aldyn alýǵa baǵyttalǵan taqyryptaǵy nebir ozyq ıdeıalar kórinis tapqan. Bul jádigerler adamzatty Parıj kelisimine sáıkes jahandyq jylyný deńgeıin 1,5 gradýstan asyrmaýǵa úndeıdi. Bul búgingi tańdaǵy barlyq ozyq oıly adamzattyń basty paryzy bolýǵa tıis.
Jylqybaı JAǴYPARULY,
«Egemen Qazaqstan»
Sýretti túsirgen Erlan OMAROV
