Ásirese, Shýche-Býrabaı kýrortty aımaǵy qonaqtardy qabyldaıtyn mańyzdy nysandardyń biri bolyp tabylady. Osyǵan oraı oblystyń týrıstik operatorlary tarapynan kórsetýge laıyq degen 30 týrıstik baǵdarlardy usynatyn 7 týrıstik paket usynylýda. Tipti, bul úshin úsh tildi erkin meńgergen azamattar arasynda tańdaý da júrgizildi. Sondaı-aq, budan basqa Shýche-Býrabaı kýrortty aımaǵyndaǵy týrısterdi qabyldap, qyzmet kórsete alatyn 100 nysannyń 12-si «Recommended by EXPO-2017» baǵdarlamasyna sáıkestigi týraly sertıfıkatyn alýǵa usynyldy.
Sonymen qatar, atalǵan baǵdarlamaǵa «Álem» jáne «Álem+» qonaq-úıleri de engizilgendigin ataı ketken lázim. Budan basqa, jergilikti turǵyndarǵa EKSPO-2017 halyqaralyq kórmesiniń mańyzy men maqsatyn jan-jaqty kórsetý úshin 32 baspasóz quraldary, 4 telearna men 1 aqparattyq agenttik tartylǵandyǵyn da atap ótken oryndy.
Ústimizdegi jyldyń 27 sáýirinde Kókshetaý qalasynda EKSPO-2017 halyqaralyq mamandandyrylǵan kórmesine eriktilerdi daıarlaýdyń úshinshi kezeńi aıaqtaldy. Soǵan oraı 100-ge tarta aqmolalyq erikti tańdap alynsa, olar shildeniń 3-i men 31 aralyǵynda óz mindetterine kirisetin bolady. Budan basqa, óńir aýylsharýashylyq ónimderimen de qamtamasyz etetindigi belgili bolyp otyr. Atap kórsetkende, ústimizdegi jyldyń 10 maýsymy men 10 qyrkúıegi aralyǵynda ótetin halyqaralyq mańyzdy sharaǵa jetkiziletin et jáne et ónimderi 4,6 myń tonnany; sút jáne sút ónimderi – 8,1 myń tonna; jumyrtqa – 63,0 mln dana; jemister – 0,4 myń tonna jáne kartop 2,2 myń tonna kóleminde bolady dep kútilýde.
Asqar TURAPBAIULY,
«Egemen Qazaqstan»
Aqmola oblysy
