О́tepov kóshesindegi tramvaı jelisi jerden qazyp alynyp, burynǵy temir jol ornyna jańadan asfalt tósele bastady. Almaty qalasynyń ákimdigi bıyl jaz aıynda ótetin qurylys jumystarynyń aıasynda Shevchenko men Qonaev, О́tepov kóshelerindegi barlyǵy 7,5 shaqyrymǵa sozylatyn tramvaı joldary relsten tolyqtaı tazartylady dep málimet taratty. Alda – Maqataev kóshesi! Shoıyn joldan bosaǵan aýmaqqa asfalt tóselip, jeńil kólikter aıaldaıtyn avtoturaqtarǵa oryn daıyndalyp, jol jıekteri sándelýde. Oǵan Almatynyń taǵy bir sońǵy jańalyǵy – velosıped joldary jarysa tósele bastady.
Kún sanap kórkeıip, saǵat sanap aınalaǵa qanatyn jaıyp ulǵaıǵan alyp megapolıstiń qoǵamdyq kólik qatynastary qyzmetiniń múldem jańa úlgige kóshkeni de belgili. Onyń biri – Almaty metrosy. Aldaǵy jyldyń sońyna deıin jańadan «Saryarqa,» «Dostyq» beketteri paıdalanýǵa berilmek. Munyń syrtynda qala basshylyǵynyń taıaý mezgilde turǵyndardyń kúndelikti júrip-turýyn meılinshe jeńildetetin «Almaty-2020» atty jańa jobany júzege asyratyn túri bar.
...Eń alǵashqy tramvaı Almaty kóshelerinde 1937 jyly kúzde jolǵa shyqqan eken. Sol zamannyń eń tıimdi ári órkenıet úlgisi sanalǵan tramvaı kóligi araǵa 80 jyl salyp Almatymen qoshtasyp otyr.
Talǵat SÚIINBAI,
«Egemen Qazaqstan»
ALMATY
