«Qazaqstanym-Ǵajapstanym» aıdarymen jarııalanǵan músháıraǵa elimizdiń túkpir-túkpirinen úlkendi-kishili 50-ge tarta aqyn qatysty. Aqyndar atalmysh taqyrypty ár qyrynan ashyp, keńinen tolǵaýǵa qulash urǵanymen, kópshiligi dittegen jerden kórine almady.
Qazylar alqasy dámeli jyrlardy saraptaı, saralaı kele, 12 aqyndy júldege laıyq dep tapty. Sonymen, kórnekti jazýshy, Memlekettik syılyqtyń laýreaty Qoıshyǵara Salǵara tóraǵalyq etken qazylardyń sheshimimen:
Bas báıgeni (2 mıllıon teńge) Halyqaralyq «Alash» ádebı syılyǵynyń laýreaty, Qazaqstan Jazýshylar odaǵy basqarmasy tóraǵasynyń birinshi orynbasary Ǵalym Jaılybaı «Qazaqstan», «Rýh jyry», «Qarataý» toptamasymen qanjyǵasyna baılady.
Birinshi oryn (1mıllıon teńge) – Ońtústik Qazaqstan oblysyndaǵy Maqtaaral aýdanynyń týmasy Yqtııar Myrzaqulovqa buıyrdy. Qazaqstannyń basty-basty 21 qalasyn jyrǵa qosyp, elimizdiń kelisti kelbetin jarqyrata asha bilgen, oqyrmanǵa kóp tanyla qoımaǵan jas aqyn músháıranyń jańalyǵy boldy.
Eki ekinshi oryn (500 myń teńgeden) qyzylordalyq belgili aqyn Tolybaı Abylaevqa «Jeruıyq» tolǵaýy, astanalyq jas aqyn Arman Sherızatqa «Astana» óleńi úshin berildi.
Úshinshi úsh oryndy (250 myń teńgeden) almatylyq Ǵalym Qalıbekuly «Qazaqstan máńgilik mahabbatym» toptamasymen, elordalyq Oljas Qasym «Ebineı kórgen EKSPO», aıagózdik Aqash Kóksegenov «Meniń altyn tiregim» tolǵaýlarymen bólisti.
Sondaı-aq, Dostyq Tileýbergenov (Qyzylorda oblysy, Qarmaqshy aýdany) «Kók týdy súıem», astanalyq aqyndar: Ularbek Dáleı «Esil boıyn jaǵalata úı tiktim», Baltabek Nurǵalı «El baqyty − Elbasy», Qýat Rahatuly «Arman qala – Astana», Muqııat Qoıshybaı «Gúl kómkergen Saryarqa» óleńderi úshin (150 myń teńgeden) yntalandyrý syılyqtaryna ıe boldy.
«Egemen-aqparat»
