EKSPO-2017 halyqaralyq mamandandyrylǵan kórmesi «Bolashaq energııasy» taqyrybymen ótip jatqandyqtan, batysqazaqstandyqtar da álemniń jańa, ekologııalyq taza qýat kózderine ótýine úles qosatyn jańa, qyzyqty jobalaryn usynyp kórmek. Mysaly, qarapaıym esikti ashyp-japqanda paıda bolatyn energııany, adam edendi basqanda túsken qysymnan óndirilgen qýatty jınap, turmysta paıdalaný ıdeıasy talaıdy qyzyqtyrary sózsiz.
Qazaqstan Respýblıkasy ǴZI Batys Qazaqstan fılıalynyń tóraǵasy, «QazATBI» ǵylymı-bilim berý kesheniniń prezıdenti, QR ǴZA akademıgi Aqserik Áıtimov ózi quryltaıshylyq etetin QazIITÝ Qazaq ınnovasııalyq telekommýnıkasııalar júıesi ýnıversıteti ǵalymdary halyqaralyq kórmege qos joba ázirlegenin aıtady. Onyń biri – Elbasy ǵalymdarǵa tapsyrǵan elektrondy valıýta jobasy bolsa, ekinshisi – adam mıynyń paıdalanylmaı jatqan bóligin iske qosý baǵytynda eken.
Batys Qazaqstan oblystyq týrızm jáne syrtqy baılanystar basqarmasynyń basshysy Ánýar Nıetqalıevtiń aıtýynsha, oblys 31 shilde men 5 tamyz aralyǵynda Astana qalasy boıynsha mazmundy baǵdarlama ázirlep otyr eken. 4 tamyz kúni EKSPO-2017 qalashyǵynda Batys Qazaqstan oblysy kórme meımandary aldynda úlken gala-konsert beredi.
– Hadısha Bókeeva atyndaǵy oblystyq qazaq drama teatry ujymy da 28 shilde men 6 tamyz aralyǵynda Astana qalasynda bolady. Qalıbek Qýanyshbaev teatrynyń ǵımaratynda eki qoıylym qoımaqpyz. Onyń biri – halyqaralyq teatr festıvalderinen eki márte Gran-prı júldesin jeńip alǵan «Troıa arýlary» (Evrıpıd) tragedııasy bolsa, ekinshisi – bashqurt dramatýrgi F.Býlıakovtyń «Qysqa ǵumyr» muńdy komedııasy, – deıdi teatr dırektory Qýanysh Amandyqov.
Qazbek QUTTYMURATULY,
«Egemen Qazaqstan»
Batys Qazaqstan oblysy
