Osylaısha eń kóp energetıka óndirýshi jáne tutynýshy memleket retinde balamaly qýat kózderin damytýǵa álem nazaryn aýdarmaq. Sońǵy jyldary qant quraǵynan bıootyn óndirý salasynda kósh bastap kele jatqan taılandtyqtar kórme kezinde qonaqtarǵa qýat qorlaryn paıdalanýdyń nebir túrleri men aýany lastamaýdyń joldaryn kórsetpek. Ony aýyl sharýashylyǵy salasynda jetken joǵary nátıjeleri arqyly tanystyrady.
Kórme zalynda taılyqtardyń ómir salty, túp tarıhy men tabıǵı baılyqtarynyń energetıkalyq áleýeti usynylǵan. Birinshi bólimde Taılandtyń kishireıtilgen úlgisin jeńil ınfografıkalar men dınamıkalyq demonstrasııalar tehnologııasy arqyly túsindiredi. Ekinshi bólim – mádenı kórsetilim. Sahnada barlyq jastaǵy adamdardyń nazaryn eriksiz aýdaratyn – jaryq dıodty LED ekran. Munda taı mádenıetiniń túrli tustaryn tamashalaısyz. «Biz «Taıland keremeti» dep atalatyn tujyrymdama jasadyq. Sonyń aıasynda, qazaq halqy saýyq-saırandy jaqsy kóretindikten, tamasha mádenı is-sharalar men oıyn-saýyqtar usynamyz», deıdi joba avtorlary.
Pavılonda bolashaqta paıdaǵa jaraıtyn qýattyń jańartylatyn kózderi jáne energııa qýaty týraly aqparattar legi toptastyrylǵan. Taı halqynyń bir sımvoly jáne boıtumary – palang. Bul – kádimgi júgeri. Ol, Korol ınstıtýtynyń derekteri boıynsha, bolashaq qýatyn alǵa jyljytýǵa arnalǵan kúshti kórsetetin «bılik», «kúsh» jáne «bılik úshin áleýet» degendi bildiredi.
«Júgeri – Qazaqstan halqy úshin de azyq-túlik ónimi. Sondyqtan júgerini paıdalana otyryp, jergilikti turǵyndarmen baılanysty tıimdi ornatýǵa bolatyny sózsiz. EKSPO- 2017 kórmesi úshin boıtumar retinde júgerini tańdaǵan sebebimiz osy», deıdi olar.
Kórme barysynda palang bolashaq zerthanalardy óz «aýzymen» tanystyrady. Ol bolashaqtyń qýatyn qalaı paıdalaný kerektigin erekshe hıkaıamen baıandaıdy. Munda qant quraǵy, evkalıpt, rezeńke, kúrish, júgeri jáne aýyl sharýashylyǵy ónimderiniń qaldyqtary, manıoka men palma sııaqty bıomassa jáne bıootyn týraly aqparattar beriledi. Bıootyn jasaý agronomdardyń tabysyn ulǵaıtsa, ekinshi jaǵynan qoqys kólemin azaıtady eken. Taılyqtar turaqty energııanyń damýyn gúldep turǵan aǵash arqyly bildirmek. Al olardyń logotıpi Taıland kartasyna uqsaıdy.
Árıne, kórme kezinde bul ulttyń erekshelikterin de kóresiz. Dál sol jerde taı taǵamyn usynatyn meıramhana men taı massajy salony jumys istep tur. Aldaǵy ýaqytta tanymal «Mýaı taı» sheberleri taı boksynan shoý kórsetedi desedi. Al ulttyq kúnderin toılaý Qazaqstan men Taıland arasyndaǵy dıplomatııalyq qatynastardyń 25 jyldyǵyna sáıkes kelip otyr. Sondyqtan ataýly oqıǵa aıasynda birqatar merekelik sharalar ótkizý josparlanǵan.
Ashat Raıqul,
«Egemen Qazaqstan»
Sýretti túsirgen Erlan Omarov,
"Egemen Qazaqstan"
