Bıyldan bastap menedjment jáne ekonomıka pánderin qazaq tilinde júrgizý júzege asyrylady eken. Bul týraly memleketimizdegi ýnıversıtet bólimshesiniń bas dırektory Baýyrjan Qasymbergebaev habardar etti.
Bólimshe basshysynyń aıtýynsha, memlekettik mártebege ıe bolǵan tilde joǵary bilim berý kerektigin ómir talap etip otyr. Onyń ústine naryqtaǵy tildik suranystyń qajettigin bolashaq mamandar da bilip, ótinish bildirdi. «Bul táýelsiz el jastarynyń ana tiline degen qurmetin, izetin, oń nıetin bildirse kerek. Buǵan kórshi memlekettiń azamattary da tarshylyq jasamaı, múmkindiktiń tıimdi joldaryn qarastyryp otyr», deıdi ol.
Máskeý qalasynda ornalasqan ýnıversıtette álemniń elý memleketinen alpys myńǵa taıaý stýdent bilim alady eken. 2003 jyly «Sınergııa» ýnıversıteti menedjmentti damytý boıynsha Eýropalyq qordyń múshesi bolsa, 2006 jyly ýnıversıtetterdiń Uly hartııasyna qosylǵanyn da aıta ketsek deımiz. Sol sekildi bul bilim ordasy Eýropalyq elektrondyq oqý kepildigi qorynyń akkredıtasııasynan ótken Reseıdegi birinshi mekeme bolyp tabylady.
Súleımen Mámet,
«Egemen Qazaqstan»
