Kórmege latyn álipbıinde jaryq kórgen 130 kitap qoıyldy. Olardyń arasynan «Álippeden» bastap «Hımııa», «Algebra», «Bıologııa» kitaptaryn, mektepke qajet basqa da oqý quraldaryn, sondaı-aq, Muhtar Áýezov, Beıimbet Maılın, Sultanmahmut Toraıǵyrov, Sábıt Dónentaev, Sáken Seıfýllın, Isa Baızaqov, О́tebaı Turmanjanov syndy aqyn-jazýshylardyń kórkem shyǵarmalaryn, balalarǵa arnalǵan ertegilerdi, «Qozy Kórpesh – Baıan sulý», «Alpamys» syndy epıkalyq jyrlardy ushyrastyrdyq. Jalpy, Ulttyq akademııalyq kitaphananyń kitap qorynda 1500-deı latyn álipbıinde shyǵarylǵan kitap bar eken.
Shara barysynda «Qazaqstan -2050» jalpyulttyq qozǵalysy keńesiniń tóraǵasy Muhtar Mankeev kórmeniń kitaphanamen birlesip jasalǵan alǵashqy shara ekenin tilge tıek etti. Bul kórmeni elimizdiń basqa da oblystary estafeta retinde jalǵastyratynyna senim artty.
Qoǵam qaıratkeri, fılologııa ǵylymdarynyń doktory, professor Myrzataı Joldasbekov latyn álipbıine kóshý qoǵamda qıyndyq týdyrmaıtynyn atap ótti. Ǵalymnyń aıtýynsha, latyn álipbıine kóshý týraly oılar táýelsizdiktiń alǵashqy jyldarynan bastap oqtyn-oqtyn aıtylyp kele jatyr. Sondyqtan qoǵam buǵan daıyn. Bir másele – latyn jazýynyń eń yńǵaıly, durys nusqasyn tańdap alý. Myrzataı Joldasbekov sondaı-aq, latyn álipbıinde qaıta basyp shyǵaratyn kitaptardy irikteýde muqııat bolý kerektigin alǵa tartty.
Saıası ǵylymdar doktory, professor Kamal Burhanov latyn álipbıine kóshken elderdiń tájirıbesi 2006 jyly elimizde zerttelgenin málimdedi. «2006 jyly elimizdegi 5-6 ınstıtýtqa aqsha bólinip, latynǵa kóshken elderdiń tájirıbesin zerttegenbiz. Tarıh ınstıtýty osy máseleniń tarıhyn zerdeledi. Osy maqsatta bizdiń bir top ǵalymdar Túrkııaǵa, bir toby Ázerbaıjanǵa, bir toby О́zbekstanǵa issaparǵa shyqty. Olar latyn álipbıine kóshýge baılanysty barlyq máseleler boıynsha zertteý júrgizdi. Qazirgi tańda bul zertteýler sol kezde osy másele boıynsha jumys jasaǵan ınstıtýttarda saqtaýly», dedi ǵalym.
Aıgúl SEIIL,
«Egemen Qazaqstan»
Sýretti túsirgen
Orynbaı BALMURAT
«Egemen Qazaqstan»
