Sharshy alańnyń shańy shyǵyp tur

Baký tórinde kezdesýler qy­zyq­ty jáne tartysty ótip ja­tyr. Keshe boksshylar álem chem­pıo­na­ty­nyń jartylaı fınalyn­da kúsh sy­nasty. Bul aıqastar tús­ki jáne keshki baǵdarlamaǵa bólinip, ádet­te­gi­deı eki rıngte emes, endi bir ǵa­na sharshy alańda ótti. Osy jol­dar­dy jazyp otyrǵanda bizge eń jeńil sal­maqtaǵy eki kezdesýdiń ǵana ná­tı­jesi belgili boldy. Birinshisinde Olımpıada men álemniń eki dúrkin chempıony qytaılyq Zoý Shımın reseılik Davıd Aıra­petıan­dy utty. Ekinshi kezdesýde Azııa chempıony, álem chempıo­na­tynyń qola júlde­geri koreıalyq Jong Shın mońǵo­lııa­lyq álem chem­pıony Serdamba Pýrevdorjdan aılasyn asyrdy. Osy tórt boksshynyń bári bir-birimen kezdesip júrgen boks­shy­lar. Mılanda ótken sońǵy álem chem­pıonatynda da osy boks­shy­lar­­dyń kezdeskeni esimizde. Sol kezde reseılik Aırapetıa­n­nyń fınalda mońǵol boksshysyna qalaı ese jibergeni kúni búginge deıin kóz aldymyzda. Endi olardyń jo­ly bıylǵy synda túıispese de, ekeýi de fınalǵa barar jolda qar­sy­las­tarynan utylýǵa májbúr boldy. Keshe basqa elderdiń boksshy­larynan – Ýkraınadan tórteý, Kýbadan úsheý, Anglııa, Brazılııa, О́zbekstan, Italııadan eki-eki boks­shydan rıngke shyqsa, AQSh, Irlandııa, Tájikstan, Mońǵolııa, Belarýs, Latvııa, Úndistan, Germanııa­dan bir-bir adamnan qolǵap túıis­tirdi. Al Reseıden Aırapetıannan basqa Mısha Aloıan men Egor Mehonsev, Qytaıdan Zoý Shımınnen basqa Ýanýan Ýang kezdesý ótkizdi. Al alań ıelerinen bıyl eki boks­shy jartylaı fınalǵa shyǵyp otyr. Sonyń biri asa aýyr sal­maq­taǵy Magomedrasýl Medjıdov biz­diń Ivan Dychkomen keshki baǵdar­la­mada kezdesti. Ázerbaıjan shırek fınalda Kýbanyń alyby ataq­ty Felıks Savonnyń jıeni Erıslandı Savondy úsh raýndta úsh ret nokdaýnǵa jiberip, kelesi aınalymǵa shyqqan bolatyn. Osy kúni Ázerbaıjannyń taǵy bir úmiti 91 kılodaǵy Teımýr Mammadov qytaı Ýanýan Ýangpen aıqasty. Bıyl Brazılııa quramasy da jaqsy boks kórsetýde. Olar da alań ıeleri sııaqty eki boks­shy­syn jar­ty­laı fınalǵa shyǵardy. Álem chem­pıonatynda osy br­a­zı­lııa­lyq­tar týraly bizdiń bapkerler «Al­ma­tyda jarysqa keler aldynda biz­den boksty úırenip edi, endi kór­­d­iń be, ózimizdiń basy­myzǵa taıaq bolyp tıip jatyr», dep qal­jyńdap qoıady. Ár qal­jyń­nyń as­tarynda shyndyq bar demekshi, latynamerıkalyqtar bıylǵy syn­daǵydaı qarqyndaryn saqtasa, Lon­don Olımpıadasynda qaı el boksshylaryna bolsa da kútpegen syı jasaýy ábden múmkin. Keshe keshkisin jartylaı fınalda Ǵanı Jaılaýov kýbalyq Ia­snıer Toledomen, Serik Sá­pıev latvııa­lyq Egıdıýs Kavalaıaýskaspen, Ádil­bek Nııazym­betov ózbek El­shod Rasýlovpen jáne asa aýyr sal­maqtaǵy Ivan Dychko ázerbaı­jan Magomedrasýl Medjıevpen kez­desti. Á.Nııazymbetov pen S.Sápıev fınalǵa shyqsa, Ǵ.Jaılaýov pen I.Dychko qar­sylas­­tarynan jeńilip, qola júldege ıe boldy. Dastan KENJALIN – Bakýden.