Jańa halyqaralyq ortalyq quryldy

Álemdegi astyqty eksportqa shyǵaratyn aldyńǵy qatarly on memlekettiń sanatyndaǵy Qazaqstan men Germanııanyń, onyń ishinde aýylsharýashylyq teh­nıkalaryn shyǵaratyn nemis kompanııalarynyń arasyndaǵy áriptestik baılanys kóp jyldardan beri tıimdi jalǵasyn tabýda. Búginde álemdik rynokta úlken suranysqa ıe «Klaas», «Lemken», taǵy basqa markaly tehnıkalardy kóptep kezdestirýge bolady. Elimizde aýyl sharýashylyǵy tehnıkalaryn shyǵa­ratyn germanııalyq 15 fırma jumys isteıdi. Olardyń ókildikteri Aqmola oblysynda da ashylǵan. 2010 jyly Germanııa jáne Qazaqstan aýyl sharýa­shylyǵy mınıstrlikteriniń memleketaralyq kelisim-sharttaryna sáıkes respýblıkamyzda nemis agrarlyq ortalyǵyn qurý jóninde sheshim qabyldanǵan edi. Astyqty Zerendi aýdanynda ótken «Alqap kúninde» osy ortalyqtyń tusaýkeseri boldy. Saltanatty sharaǵa Qazaqstan Respýblıkasy Aýyl sharýashylyǵy mınıstrliginiń jaýapty hatshysy Evgenıı Aman, Germanııanyń Azyq-túlik jáne tutynýshylar quqyǵyn qorǵaý mınıstrliginiń memlekettik hatshysy Peter Blezer, Aqmola oblysy ákiminiń birinshi orynbasary Qadyrhan Otarov, soltústik óńirdegi jetekshi astyq sharýashylyqtarynyń basshylary, ǵalymdar qatysty. Memlekettik hatshy men jaýapty hatshy eki el arasyndaǵy dástúrli baılanystar ýaqyt talabyndaǵy kúrdeli mindetterdi sheshýge oń yqpal jasaıtyndyǵyn atap kórsetti. Germanııalyq beldi fırmalardyń mamandary jańa tehnıkalar men tehnologııalardyń azyq-túlik qaýipsizdigin qamtamasyz etýdegi, eginshilik mádenıetin kóterý jáne zamanalyq aýyl sharýa­shylyǵy strategııasyn qalyptastyrýdaǵy ornyna keńinen toqtaldy. Jańa qurylǵan halyqaralyq ortalyqqa júkteler mindetter týraly atalǵan jobany júzege asyrýshy Hoıenhaım Batys Eýropa ýnıver­sıtetiniń dırektory doktor Haın Shıýller arnaıy baıandama jasady. Saltanatty sharaǵa qatysýshylar Zerendi aýdanynyń egistik alqaptaryndaǵy, dala qyrmandary men elevatorlardaǵy qarbalas jumys barysymen tanysty. Baqbergen AMALBEK, Aqmola oblysy.