Olarǵa Reseıdiń Samara memlekettik medısınalyq ýnıversıtetiniń meıirgerlerge bilim berý ınstıtýtynyń dırektory, medısına ǵylymdarynyń doktory L.Karaseva dáris oqydy. Batys Qazaqstan oblysy densaýlyq saqtaý basqarmasynyń bas mamany Qarlyǵash Sadyqova da tájirıbesimen bólisip, qazirgi medısınanyń qaǵıdalary jaıynda aıtty. Elimizdegi densaýlyq saqtaý salasyn damytý baǵdarlamasy aıasynda meıirgerler isi qyzmetine erekshe kóńil bólinip keledi. Búginde orta býyn medısına qyzmetkerleri suranysqa ıe mamandar qatarynda. Olardy daıarlaý júıesi de jetildirildi. Atyraý medısına kolledjiniń dırektory Laýra Qubaeva Samara memlekettik medısınalyq ýnıversıteti men kolledj arasynda yntymaqtastyq týraly kelisimge qol qoıylǵanyn aıtady. Halyqaralyq deńgeıge baǵyttalǵan meıirger isi qyzmetin damytý boıynsha bilim ordasynda naqty sharalar júzege asyryla bastady. Atyraý medısına kolledji 2019 jyly Joǵary medısınalyq kolledj bolady. Soǵan baılanysty kolledj oqytýshylarynyń biliktiligin kóterý máselesi nazar aýdartyp otyr.
– Aımaqta meıirbıke isi mamandyǵy boıynsha magıstr maman joq, – deıdi oblystyq densaýlyq saqtaý basqarmasynyń basshysy Mánshúk Aımurzıeva. – Sondyqtan óńirdegi meıirbıkeler arasynan aǵylshyn tilin jetik biletin úsh maman Polshaǵa tájirıbeden ótýge jiberiledi, taǵy úsh mamandy magıstratýrada oqytýdy jos-parlap otyrmyz. Orta býyn medısına qyzmetkerleri bar bilgenderimen shektelip qalmaı, zamanǵa saı izdenýleri, til úırenip, jańa tehnologııalardy qoldanýy kerek. Ol úshin Atyraý oblysynda barlyq jaǵdaı jasalǵan.
Aımaqtaǵy orta býyn medısına qyzmetkerleri úshin jańadan ashylǵan «Bas meıirgerler mektebiniń» mańyzy zor bolmaq. Meıirgerlik kómektiń joǵary kásibı deńgeıin qamtamasyz etýge baǵyttalǵan jumystardy júrgizetin mektep túrli semınarlar men sharalar uıymdastyrý, mamandardy basqa óńirlerge, shetelderge tájirıbeden ótýge jiberý syndy qyzmetterdi de atqarady.
Baqytgúl BABASh,
«Egemen Qazaqstan»
ATYRAÝ
