Olaı deıtin sebebimiz, Alataý baýyryndaǵy ásem shahar Almatynyń tórinde qońyr kúzde Saǵat Áshimbaevtyń týǵanyna 70 jyl tolýyna oraı úlken jıyn, ǵylymı konferensııa ótedi. Bulaǵynan sý iship, alǵashqy oqýǵa yntyzar júregin, yntyq kóńilin týǵan jerindegi mektepten, kitaphanadan bilim nárimen sýarǵan Saǵat Áshimbaevtyń jerlesteri mereıli toıdyń elden bastalýyn úlgi retinde ózderi qalapty. Aldymen Narynqolda týǵan eliniń azamattary uıymdastyrǵan resmı jıyn ótip, keıin Saǵat Áshimbaev týyp-ósken Jambyl aýylynda, Aqkól jaılaýynda óz yrǵaǵyn, mánin tapty.
Oblys basshylyǵynyń qoldaýymen aýdan ákimdigi uıymdastyrǵan sharanyń resmı bóligin aqyn, Memlekettik syılyqtyń laýreaty, Qazaqstan Jazýshylar odaǵynyń basqarma tóraǵasy Nurlan Orazalın júrgizdi. Sóz tizginin qolǵa alǵan moderator sahna tórine qaıratkerdiń dosy, jazýshy Smaǵul Elýbaıdy, Saǵattyń jary, jazýshy Shárbaný Beısenovany, zamandas-qalamdastarynyń biri, jazýshy Maǵıra Qojahmetovany, jazýshy, «Qazaq ádebıeti» gazetiniń bas redaktory Jumabaı Shashtaıulyn, Saǵattyń uly, Parlament Májilisiniń depýtaty Máýlen Áshimbaevty, oblys ákiminiń orynbasary Jaqsylyq Omardy, aýdan ákimi Janat Tájıevti jáne Raıymbek aýdandyq aqsaqaldar alqasynyń tóraǵasy Sabyr Dosymbekovti shaqyryp, keleli jıyndy bastady.
Saǵat Áshimbaevtyń ómir joly men shyǵarmashylyǵy týraly zamandastary estelik aıtyp, ádebıet synshysy Álııa Bópejanova baıandama jasady.
Týǵan eli Saǵatyn saǵynypty. Saǵattaı elge qyzmet qylar uldaryn saǵynypty.
Baǵashar TURSYNBAIULY,
«Egemen Qazaqstan»
Almaty oblysy
