Ulttyq áskerı-patrıottyq ortalyqta uıymdastyrylǵan saltanatty sharada shekara qyzmetinde uzaq jyldar eńbek etip, el tynyshtyǵy úshin mańdaı terin tókken ardagerlerge syı-qurmet kórsetildi. Sondaı-aq, osy kúnde mindetin minsiz atqaryp, áriptesterine úlgi bolǵan úzdik shekarashylar men salanyń maqtaýly mamandary da basshylyq tarapynan túrli marapattarǵa ıe boldy.
Kásibı merekeniń 25 jyldyǵy qarsańynda respýblıka aýmaǵyndaǵy shekaralyq beketterdi sharlaǵan atalǵan mekemeniń mereıtoılyq rámizi Astanaǵa qaıta oraldy. Ony saltanatty jaǵdaıda qabyldap alǵan Ulttyq qaýipsizdik komıteti tóraǵasynyń orynbasary-Shekara qyzmetiniń dırektory general-maıor Darhan Dilmanov Táýelsizdiktiń alǵashqy jyldarynda jańa qalyptasqan memlekettiń shekaralyq qadasyn qaǵyp, tuǵyryn nyqtaýda, aıqyn maqsat, naqty tapsyrmalardy júkteýde Elbasy Nursultan Nazarbaevtyń eńbegi eren ekendigin eskertip ótti.
«Keńes kezeńinde Qazaqstannyń shyǵystaǵy kórshisi Qytaı elimen 1 500 shaqyrymdaı ǵana shekaralyq aýmaǵy bolyp, sony jiti baqylaýda ustady. Al Táýelsizdik alǵannan keıingi jyldarda bul kórsetkish kólemi on bes myń shaqyrymnan asyp tústi. Jas memleket úshin osynshama baıtaq jerdi kózdiń qarashyǵyndaı qorǵaý men saqtaý ońaı sharýa emes ekeni belgili edi. Memleket basshysy aıqyndap bergen baǵyt-baǵdarlarmen júre otyryp, biz búgingideı tamasha jetistikterge jettik. Qaı memleketti alsaq ta, onyń áleýeti ulttyq qaýipsizdik qyzmetiniń jaı-kúıimen ushtasatyndyǵyn eskersek, bizdiń búgingi bıikterimiz bir beles bolyp tabylady», dedi ol.
D.Dilmanovtyń aıtýynsha, ózi jetekshilik etetin sala mamandary bul kúnde sońǵy úlgidegi zamanaýı qarý-jaraq pen túrli tehnıkalarmen qamtamasyz etilip, qatarlary áskerı mindetterin minsiz oryndaı alatyn kásibı sheberlikteri shyńdalǵan tájirıbeli mamandarmen tolyqqan. Qazaqstan álemdegi qurlyqtyq shekarasy aýqymdy elderdiń qatarynda. Ushqan qustyń qanatyn taldyryp, tulpardyń tuıaǵyn tozdyratyn Uly dala eliniń memlekettik shekarasyn kúzetý isiniń sheberleri bıylǵy jyldyń alǵashqy jartysyn joǵary kórsetkishtermen qorytyndylaǵan. Atap aıtqanda, alty aı ishinde el shekarashylary 12 myńnan astam memlekettik shekara quqyn buzý oqıǵasyn tirkegen. Sol sııaqty esirtki zattaryn tasymaldaýdyń astyrtyn joldaryn anyqtaý isinde de mamandardyń ábjil áreketti aıqyn kóringen.
«Aýyz toltyryp aıtarlyqtaı bıylǵy jetistikterimiz az emes. Onyń bári de qatarymyzdaǵy senimdi seriktes, bilikti áriptesterimizdiń eren eńbeginiń nátıjesi. Sondyqtan da 1 280 shekarashyny kásibı mereke kúni qarsańynda saltanatty túrde marapattaǵandy jón sanadyq. Olardyń keıbiriniń merziminen buryn sheni ósse, endi biriniń keýdesine merekelik tósbelgi taǵýdamyz», dedi D.Dilmanov.
Nurlybek DOSYBAI,
«Egemen Qazaqstan»
