«Abaı sózi – qazaqtyń boıtumary, Abaı murasy – qazaqtyń qasıetti qazynasy» dep Elbasymyz Nursultan Nazarbaev aıtqandaı, dana babamyzdyń asqaq músinine gúl shoqtaryn qoıýmen bastalǵan mádenı baǵdarlama ádebı-sazdy keshke ulasty.
Astana qalasy ákiminiń orynbasary Ermek Amanshaev málim etkendeı, rýhanı jańǵyrý bastamasy kóterilgen kúnnen bastap, búginge deıin qala kóleminde úlkendi-kishili 200-den astam shara ótken. «Búgingi basqosý sonyń jalǵasy. Iаǵnı, dana babamyzdyń óshpes taǵylymynan nár alý maqsatynda «Abaı aptalyǵy» uıymdastyrylyp otyr. Oǵan ákimdikke qarasty barlyq salalyq mekemelermen qatar, bilim oshaqtary, mádenı oryndar qamtylady», dedi qala ákiminiń orynbasary.
Ádebı-sazdy keshti jyrmen ashqan aıtysker aqyn Amanjol Áltaevtyń «Bilimniń qaınar bulaǵy – Abaı, ǵylymnyń jaryq shyraǵy – Abaı, qazaqtyń nárli quraǵy – Abaı, ultymnyń úlpildegen júregi – Abaı» dep jyrlaǵan mánerli shýmaqtary kórermendi bir serpiltip tastady.
Odan keıin Abaıdyń kúıi «Torjorǵany» oryndaǵan «Serper» dombyrashylar ansamblinen soń sahnaǵa kóterilgen halyq aqyny Qonysbaı Ábil aqyn atamyzdyń rýhyna arnap:
Kóńiliń ketse kirlenip,
Eminiń bári Abaıda,
Renjitip alyp júrmelik,
Abaıla, qazaq, abaıla! – dep júrek jyryn tógiltse, jas aqyndar Mereı Qart, Juldyzaı Ysqaq, Arman Sherızat sherli tolǵaýlaryn aqtardy.
Dástúrli ánshi Erlan Rysqalı oryndaǵan Abaıdyń «Segiz aıaǵy» men Elmura Jańabergenova shyrqaǵan «Jarq etpes qara kóńilim ne qylsa da...» ánderi, sonymen birge, elimizge eńbek sińirgen ártis Kenjeǵalı Myrjyqbaı oryndaǵan «Qarańǵy túnde taý qalǵyp», «О́lse óler tabıǵat, adam ólmes» ánderi elordanyń mamyrajaı aspanyn terbedi.
Ashyqaspan astynda ótken ádebı keshke jınalǵan jurtty Q.Qýanyshbaev atyndaǵy memlekettik akademııalyq qazaq mýzykalyq drama teatrynyń ártisi Qasymhan Buǵybaı oryndaǵan monolog mándi, mańyzdy, uıyqtap ketken júrekti oıatar ásem sazdylyǵymen este qalsa, Ortalyqtandyrylǵan kitaphanalar júıesi uıymdastyrǵan «Abaıdyń murasy – qazaqtyń asyl qazynasy» atty kitap kórmesi Abaı shyǵarmalaryn nasıhattaýdyń úlgisi boldy desek jarasady.
Uly babamyzdyń týǵan kúnine oraılastyryp ótkizgen bul sharany qala turǵyndary men qonaqtary jáne zııaly qaýym ókilderi kelip tamashalady.
Beken QAIRATULY,
«Egemen Qazaqstan»
Sýretti túsirgen Erlan OMAR,
«Egemen Qazaqstan»
