Sapar barysynda A.Mamın Quryq portyndaǵy parom kesheninde bolyp, ekinshi iske qosý kesheniniń qurylysy boıynsha keńes ótkizdi. Oǵan Mańǵystaý oblysynyń ákimi Eraly Toǵjanov qatysty.
Jıyn barysynda porttyń 114 nysanynda jumystar júrgizilip jatqandyǵy aıtyldy. Paromnyń avtokólikterge arnalǵan nysany salynyp, teńiz jaǵalaýy tabanyn tereńdetý jumystary aıaqtalýda. Batys jáne Shyǵys qorshaýlarynyń qurylysy boıynsha jumystar júrgizilýde.
Joba basshylary porttyń turaqty jumysyn qamtamasyz etý, pırsterdi iske qosý, avtokólikterdi kóterip, ótkizetin kópirdiń montajdaý jumystarynyń aıaqtalǵandyǵyn habarlady. Úlken kólemdi júk úshin qosymsha aılaq salý quryq portynyń qýatyn 7 mıllıon tonnaǵa deıin arttyrady. Qazirgi ýaqytqa deıin 166-dan astam keme portqa kelip toqtady, 756 myń tonnadan astam júk túsirilip-tıelgen. Bıyl 1 mln 300 myń tonna, al kelesi jyly 15 myń avtokólik jáne 3 mln tonnaǵa deıin tıep-túsirý josparlanyp otyr.
Premer-Mınıstrdiń birinshi orynbasary Asqar Mamın Mańǵystaý oblysynda strategııalyq mańyzy bar «Nurly jol» baǵdarlamasynyń birqatar jobalarynyń júzege asyrylyp jatqandyǵyn aıtty. Onyń ishinde, Quryq portyndaǵy parom kesheniniń qurylysyn, Beıneý – Aqjigit jáne Shetpe – Aqtaý avtojoldarynyń qurylysyn erekshe atap ótti. A.Mamın elimizdiń básekege qabilettiligin arttyrýda, tranzıttik jáne eksporttyq áleýetti ulǵaıtýda Quryq parom kesheni qurylysynyń mańyzdylyǵyna nazar aýdardy.
Quryq parom keshenindegi temir joldyń quramdas bóligi 2016 jyly jeltoqsanda aıaqtaldy. Aldymyzda turǵan mindet – bıylǵy jyldyń sońyna deıin avtokóliktiń quramdas bóligin paıdalanýǵa berý, dedi Premer-Mınıstrdiń birinshi orynbasary. Ol eki jobany tolyq qýatynda iske qosý Transkaspıı dálizi arqyly taýarlardy jyl boıy qabyldap, jóneltýge múmkindik beretinin, jobalardyń elimizdiń ekonomıkasy úshin mańyzdy ekendigin basa aıtty.
Elbasy Mańǵystaý óńirin damytýǵa erekshe nazar aýdaryp otyr, dedi A.Mamın. Prezıdenttiń tapsyrmasy boıynsha oblysta jańa ónerkásiptik óndiris ashylyp, kólik jáne týrızm salalarynda jobalar júzege asyrylýda, sondaı-aq jańa jumys oryndary qurylýda. Munyń barlyǵy óńir ekonomıkasynyń turaqty damýyn qamtamasyz etedi.
Sonymen qatar, Premer-Mınıstrdiń birinshi orynbasary oblysqa jumys sapary kezinde Beıneý – Aqjigit – Tájen avtokólik jolyna qaıta jóndeý jumystarynyń júrgizilý barysymen tanysty. Joldy jóndeý jumystary bıylǵy jyldyń shilde aıynda bastalǵan. Ekinshi kategorııaly magıstral 85 shaqyrymdy quraıdy. Ol jol Beıneýden bastalyp, О́zbekstanmen aradaǵy shekaradan ótedi.
«Nurly jol» baǵdarlamasy boıynsha salynyp jatqan nysandardy teksergennen keıin A.Mamın kóshpeli jıyn ótkizdi. Onda merdiger uıymdar basshylarynyń esebi tyńdaldy.
Olardyń aıtýynsha, qazirgi ýaqytta avto joldy qaıta jóndeý jumystary qarqyndy júrgizilýde. Jol boıynda alty demalys alańy men segiz avtobýs aıaldamasyn salý qarastyrylǵan. Ýchaskelerde 300-den astam adam men 150-den astam tehnıka jumys jasaýda. Joldy qaıta qalpyna keltirý jumystarynda qazaqstandyq óndirýshilerdiń materıaldary paıdalanylady.
A.Mamın Beıneý – Aqjigit – Tájen avtokólik jolynyń Qazaqstannyń tranzıttik-kólik áleýetin júzege asyrýǵa múmkindik beretin ınfraqurylymdyq nysan retindegi mańyzdylyǵyn aıtty.
Bul óńir úshin óte mańyzdy joba. Ol Ortalyq Azııa elderinen Aqtaý jáne Quryq teńiz porty arqyly Kavkaz, Túrkııa jáne Eýropa elderine tranzıttik avtokólik aǵynyn qalyptastyrýǵa yqpal etedi, dedi A.Mamın. Osy oraıda ol avtojoldy sapaly salyp, mejelegen merzimde aıaqtaýdy tapsyrdy.
Sondaı-aq, A.Mamın IIDMB aıasynda júzege asyrylyp jatqan jobalarmen tanysty. Ol shyny-plastık qubyrlar, temir-beton buıymdaryn, Quryq portynyń qorǵanys bógetine tetropod óndiretin zaýyttarda jáne kúshtik transformatorlardy jóndeý kásiporyndarynda boldy.
