Is-sharaǵa Assambleıa Tóraǵasynyń orynbasary jáne Hatshylyq meńgerýshisi Darhan Myńbaı, Aýyl sharýashylyǵy vıse-mınıstri Erlan Nysanbaev, májilis depýtattary jáne basqa da túrli sala ókilder qatysty.
«Astana – el táýelsizdiginiń sımvoly. Al qalany qorshap jatqan jasyl beldeý Elbasynyń sózimen aıtsaq, bolashaq urpaqqa qaldyratyn bizdiń muramyz. Bul ormandy jasaý úshin qanshama adam ter tókti. Sondyqtan, olardyń eńbegin qurmettep, aǵashtardy balalarymyz sekildi álpeshteýimiz kerek. Jasyl beldeý elge ónege bolýy tıis», – dedi D.Myńbaı.
Onyń pikirinshe, qazirgi tańda atqarylyp jatqan jumysqa jetpeıtin bir nárse bar. Ol – buqaralyq aqparat quraldarynda jasyl beldeýdi nasıhattaý. Osyǵan sáıkes, Assambleıa Tóraǵasynyń orynbasary barsha medıa ókilderin Astana ormanyn halyqqa keńinen nasıhattaýǵa shaqyrdy.
Aksııaǵa kelgen halyq qalaýlylaryna Aýyl sharýashylyǵy vıse-mınıstri Erlan Nysanbaev jasyl beldeý aıasynda atqarylyp jatqan jumystarmen tanystyrdy. Onyń aıtýynsha, alqapty qalyptastyrý kezeń-kezeńimen júzege asyp jatyr. Elordaǵa jasyl beldeý qalyptastyrý aıasynda 2025 jylǵa deıin 100 myń gektar jerge aǵash egý josparlanǵan. Osyǵan sáıkes, 1998 jyldan beri 13,5 mıllıonnan astam kóshet otyrǵyzylypty.
«Astananyń jasyl beldeý» atty aksııanyń maqsaty – shahardyń ormandy alqabynyń áleýetin dáripteý, óskeleń urpaqtyń boıyna elimizdiń tabıǵı baılyqtaryna uqypty qaraý daǵdysyn sińirý, sonymen qatar, salaýatty ómir saltyn nasıhattaý.
Sondaı-aq, aksııa barysynda qatysýshylar men qonaqtar «Jasyl beldeýdi qalpyna keltirý jáne jasyl beldeýdiń ekinshi kezeńin jasaý» jobasyna sáıkes kóshetter otyrǵyzdy. Sodan keıin, meımandar arnaıy velosherýge qatysyp, «Astana» veloklýbynyń sportshylarymen kezdesti.
Abaı Asankeldiuly,
«Egemen Qazaqstan»
