HHH Dúnıejúzilik kongresti Jobalardy basqarý jónindegi Qazaqstan qaýymdastyǵy, «Nursultan Nazarbaevtyń bilim berý qory» qoǵamdyq qory jáne «Nazarbaev ýnıversıteti» derbes bilim berý uıymy uıymdastyrdy. IPMA (Jobalardy basqarý jónindegi halyqaralyq qaýymdastyq – avt.) prezıdenti Reınhard Vagnerdiń aıtýynsha, alǵash ret mundaı konferensııa 1967 jyly Venada ótkizilgen. Al 2015 jyly Panamada mereıtoılyq sharany ótkizý quqyǵy Qazaqstanǵa buıyrǵan. Jobalardy basqarý jónindegi Qazaqstan qaýymdastyǵynyń vıse-prezıdenti, HHH dúnıejúzilik kongrestiń uıymdastyrý komıtetiniń tóraǵasy Maqsat Mamashev jobalyq menedjment salasynda atalǵan sharanyń postkeńestik keńistikte alǵash ret ótkizilip otyrǵanyn aıtady.
Eki jylda bir ret uıymdastyrylatyn kongreste bıyl álemniń túkpir-túkpirinen kelgen mamandar ózara tájirıbe almasty. Al «О́zgeristerdi basqarýdaǵy aldyńǵy qatarly quzyret» taqyryby EKSPO kórmesine oraı tańdalypty. «Kongress taqyryby týraly oılanǵan kezde aldymen búkil álem nazary EKSPO-da ekenin eskerdik. Onda aldyńǵy qatarly tehnologııalar men energetıkaǵa basa nazar aýdarylǵandyqtan, osy taqyrypqa toqtadyq», dedi Dúnıejúzilik kongrestiń Astanadaǵy baǵdarlamalyq komıtetiniń tóraǵasy Sergeı Býshýev.
Baspasóz konferensııasynda IPMA prezıdenti Reınhard Vagner jobalyq menedjmentti kóp adam túsine bermeıtinin aıtty. «Adamda aldymen ıdeıa paıda bolady. Al ony júzege asyrý úshin jospar qurylady. Mysaly, EKSPO kórmesiniń negizgi taqyryby – «Bolashaq energııasy». Al bul jobalar arqyly júzege asyrylady. Jobalyq menedjment osymen aınalysady», dep túsindirdi ol.
Bir aıta keterligi, Jobalardy basqarý jónindegi Qazaqstan qaýymdastyǵy jyl saıyn trenıngter ótkizgenimen, jobalyq menedjment elimizde mamandyq retinde oqytylmaıdy. M.Mamashevtiń aıtýynsha, kelesi jyly Nazarbaev ýnıversıtetinde osy sala boıynsha kafedra qurý josparlanyp otyr.
Konferensııa barysynda tehnıkalyq ǵylymdar kandıdaty Hıroshı Tanaka Jobalardy basqarý jónindegi Qazaqstan qaýymdastyǵynyń alǵashqy ulttyq sımpozıýmyna qatysqan sátin eske aldy. «2007 jyly Almatydaǵy sımpozıýmda spıker bolǵan edim. Sońǵy on jylda Qazaqstanda kóp nárse ózgergenin kórip otyrmyn. Halyqaralyq kongress baǵdarlamasy da kóńilimnen shyqty», dedi Hıroshı Tanaka.
Mereıtoılyq kongress aıasynda úzdik jobalyq menedjerler men úzdik jobalardy IPMA Awards jobalaryn basqarý salasyndaǵy bedeldi IPMA syılyǵymen marapattaý saltanaty ótti. Qýanarlyǵy Nazarbaev ýnıversıteti úzdik áleýmettik joba nomınasııasynda ekinshi, orta kólemdi úzdik jobalar sanaty boıynsha birinshi oryn alǵan.
Bıyl alǵash ret Dúnıejúzilik kongress aıasynda ICB4 jobalaryn basqarý boıynsha quzyrettilik standartyna negizdelgen «Sea Wolf - Competent PM» oıyny uıymdastyryldy. Sonymen qatar kongress barysynda paneldi dıskýssııalar, akademııalyq baıandamalar men tájirıbelik seksııalar ótti. Paneldi sessııalarda Germanııa, Qytaı, Ońtústik Koreıa, Japonııa, Ulybrıtanııa, Italııa, Shveısarııadan kelgen spıkerler bilim, ǵylym, ekonomıkanyń negizgi salalaryn, aldyńǵy qatarly tehnologııalardy, aeroǵarysh ónerkásibin, baǵdarlamalyq qamtamasyz etý, bank isterin jáne memlekettik basqarýdy damytýdyń serpindi tásilderi taqyryptaryn qamtydy. Sondaı-aq, mamandar bıznesti basqarýdyń kúrdeli prosesterin avtomattandyrý barysynda jobalardy basqarý ádisterin qoldaný máselelerin de kóterdi.
Uıymdastyrýshylardyń aıtýynsha, kelesi Kongress 2019 jyly Meksıkada ótedi dep boljanyp otyr.
Gúlnur Qýanyshbekqyzy,
«Egemen Qazaqstan»
