Keshe Astanada Qazaqstan Respýblıkasynyń Investısııalar jáne damý mınıstri Jeńis Qasymbek pen Fransýz Respýblıkasynyń syrtqy ister jáne Eýropa mınıstri janyndaǵy Memlekettik hatshysy Jan-Batıst Lemýannyń qatysýymen ekonomıkalyq yntymaqtastyq jónindegi Qazaqstan-Fransýz úkimetaralyq komıssııasynyń 13-shi otyrysy ótti.
Úkimetaralyq komıssııa otyrysynda saýda men ınvestısııa, energetıka, sonyń ishinde jańǵyrmaly energııa kózderi, ǵaryshtyq qyzmet, qorshaǵan ortany qorǵaý, aýyl sharýashylyǵy, densaýlyq saqtaý jáne taǵy basqa da salalar boıynsha ekijaqty yntymaqtastyq máseleleri talqylandy.
Investısııalar jáne damý mınıstri Jeńis Qasymbek Fransııanyń mamandandyrylǵan EKSPO-2017 halyqaralyq kórmesine qatysýy eki eldiń ózara is-qımylynyń joǵary deńgeıde ekenin jáne jahandyq turaqty damýdy qamtamasyz etý máseleleri boıynsha ustanymdarynyń bir ekenin aıǵaqtaıdy, dep atap ótti.
«Qýatty ekonomıkalyq áleýetke ıe Fransııa Qazaqstannyń Eýropadaǵy negizgi saýda seriktesteriniń biri. Eki el arasyndaǵy taýar aınalymynyń ósim dınamıkasy qarqyndy. 2017 jyldyń 6 aıynda Qazaqstan men Fransııa arasyndaǵy syrtqy saýda aınalymy 1,7 mlrd AQSh dollaryn qurady. Bul ótken jyldyń sáıkes kezeńimen salystyrǵanda 45,9 paıyzǵa joǵary», dedi J.Qasymbek.
Fransııa Qazaqstannyń negizgi saýda seriktesteri tiziminde 5-shi oryndy ıelenedi. Sonymen qatar, Fransııa Qazaqstanǵa ınvestısııa salý deńgeıi boıynsha da 5-shi orynda. Bul el sońǵy 12 jylda Qazaqstanǵa 13,6 mlrd dollar ınvestısııa salǵan.
Fransýz Respýblıkasynyń syrtqy ister jáne Eýropa mınıstri janyndaǵy Memlekettik hatshysy Jan-Batıst Lemýan eki eldiń úkimetaralyq komıssııasy jumys istep jatqan osy eki kúnniń ishinde Qazaqstan tarabymen kóptegen kezdesýler ótkizilgendigin aıta kele, jyly qabyldaý úshin alǵysyn bildirdi. Onyń sózine qaraǵanda kezdesýler tabysty júrýde. «Komıssııa jasaǵan hattamanyń 10 betke deıin jetýi bizdiń aramyzdaǵy iskerlik baılanystardyń qanatyn keńge jaıyp kele jatqandyǵyn jáne mazmundy ekendigin bildiredi» dedi ol.
Fransýz taraby qazaqstandyqtardy EKSPO-2017 halyqaralyq kórmesiniń tabysty ótýimen quttyqtady. Olardyń aıtýynsha, kórmedegi fransýz pavılonyn osy ýaqytqa deıin 500 myńǵa jýyq adam kelip tamashalapty. Munyń ózi pavılonnyń tartymdy bolǵandyǵyn dáleldeıtin kórsetkish. Qazaqstan taraby fransýzdarǵa kórmege belsene qatysqandyqtary úshin alǵystaryn bildirdi.
Otyrys barysynda eki eldiń ekonomıkalyq yntymaqtastyǵynyń kún tártibindegi máseleleri júıe-júıege bólinip, naqtylaı qaraldy. Sonyń ishinde Qazaqstannyń ınvestısııalyq ahýalyn odan ári jaqsartýdyń joldary, osy rette fransýz tarabynan týyndaıtyn máseleler naqty áńgime boldy. Fransýz taraby, sondaı-aq qalalyq kólik, qorshaǵan ortany qorǵaý salalaryna ınvestısııa salýǵa yntalarynyń bar ekendigin jetkizdi. Munyń syrtynda fransýz ınvestorlarynyń qatysýymen jalpy qýaty 14 MVt bolatyn jańǵyrmaly qýat óndirý jobasyn júzege asyrý máselesi naqty áńgime boldy.
Qazaqstan taraby Fransııamen aradaǵy atom ónerkásibi, ǵaryshtyq qyzmet, avıasııa, aýyl sharýashylyǵy jáne basqa da salalardaǵy áriptestiktiń óz jemisin berip, naqty jobalardyń júzege asyp jatqandyǵyn atap kórsetti. Bul jumystar odan ári jalǵasyn tappaq.
Suńǵat ÁLIPBAI,
«Egemen Qazaqstan»
