Sharaǵa salalyq, aımaqtyq kásipodaq uıymdarynyń ókilderi men saraptamalyq qaýymdastyq jáne halyqaralyq uıymdardyń ókilderi qatysty. Jıynǵa jetekshilik etken Kásipodaqtar federasııasynyń Tóraǵasy Ábilǵazy Qusaıynov qoǵamdyq sanany jańǵyrtý jolynda árbir otandasymyz óz-ózine degen kózqarasty qaıta qaraý qajettigin atap ótip, dúnıejúzilik qaýymdastyqtyń bir bóligi retinde halqymyzdyń jetken jetistigi men kemshin tustaryn saralaýdy meńgerýge shaqyrdy.
Alqaly keńeste Reseı Federasııasynyń ǵylymı qaýymdastyǵy atynan sóz alǵan professor B.Tıtov: «Sanany jańǵyrtý – qazaqstandyqtardyń sanaly tańdaýy, bul óz kezeginde Qazaqstannyń adam kapıtaly damýynyń joǵarǵy ındeksine ıe eń tabysty memleketter qatarynda bolatyndyǵynyń basty sharty», dedi. Onyń pikirinshe, osy maqsat oryndalǵan jaǵdaıda qazaqstandyq qoǵamnyń áleýmettik jańǵyrý men rýhanı progreske beıimdelýi keń óris alady.
Forýmǵa qatysýshylar «Sanany jańǵyrtý» baǵdarlamasyn sapaly júzege asyrýdyń mańyzdylyǵyn jan-jaqty talqylap, árbir oblys ortalyqtaryndaǵy kásipodaq ókilderimen tabysty jumys júrgizýdi túsindirý toptary quryldy. Sondaı-aq, osy baǵytta oryndalyp jatqan jospar-jobalardyń artyqshylyqtary týraly úgit-nasıhattyq bılbordtar ázirlenip, óńirlerge jiberilgen.
Apta sońyna deıin jalǵasyn tabatyn forýmda semınar túrindegi seksııalyq jáne plenarlyq otyrystar men trenıngter uıymdastyrylyp, kásipodaqtardyń qyzmettik ókilettigine baılanysty ózekti máseleler paneldi pikirtalastarda qyzý talqylanady dep josparlanǵan.
Nurlybek DOSYBAI,
«Egemen Qazaqstan»
