Bıylǵy oqý jylynda oblys-ta jıyrma mektep paıdalanýǵa beriledi. Osynyń 15-i «Nurly jol» baǵdarlamasymen salynsa, qalǵany jergilikti bıýdjettiń esebinen turǵyzylǵan. Qazirdiń ózinde ótken jylǵy 1021 mekteptiń sany 1027-ge jetti. Osy mektepterde 640 myńǵa jýyq oqýshy bilim alyp jatsa, onyń 73 myńy mektep tabaldyryǵyn jańadan attaǵan búldirshinder. Al mekteptegi shákirtterge 69 myńnan astam muǵalim dáris beredi.
Jańa oqý jylynda muǵalimderdi quttyqtaǵan oblys ákimi Janseıit Túımebaev «Bilim berý isi – tamyry tereńde jatqan, ult pen dinge bólinbeıtin, bir kún nemese bir jylda kórinbeıtin ǵalamat qundylyq. Al osy bir uly qundylyqty boıǵa sińiretin tulǵa – muǵalim. Iаǵnı sizdersizder, qurmetti ustazdar! Elbasymyz óziniń «Bolashaqqa baǵdar: rýhanı jańǵyrý» atty strategııalyq maqalasynda bilim men ǵylymdy jetildirýge, jas urpaq tárbıesi máselelerine basa kóńil bólgeni barshańyzǵa belgili. Sondyqtan da sizderge júkteler mindettiń salmaǵy da basym», degen bolatyn.
Ustazdarmen emen-jarqyn kezdesýde oblys ákimine turǵyn úıge baılanysty túıtkilder aıtylǵan.
О́z páteri joq, baspananyń mashaqatyn bastan ótkerip júrgen muǵalim bilim berýge qanshalyqty yntaly bolady. Ustazdyq paryz degenimizben jaǵdaıy kelispeı, ishi ottaı janyp júrgen jannan óz isine tolyq berilýdi suraý aıtqanǵa ǵana ońaı. Basqa-basqa, kezinde elimizdiń bas muǵalimi bolǵan Janseıit Qanseıituly bul máseleni jaqsy biledi. Sondyqtan da jýyrda ótken selektorlyq keńeste aýdan, qala ákimderiniń aldyna basqa máselelermen qatar muǵalimderge arnap úı salýdy tapsyrdy. Barlyq aýdan, qalalarda salynatyn tıptik úlgidegi turǵyn úılerge muǵalimder aldyńǵy qatarda ıe bola alady.
Jeke turǵyn úı sektory qolaıly bolǵanymen, ol negizinen aýyldarǵa tán bolsa kerek. Máselen, etek-jeńi mol jaıylǵan Túrkistan qalasy úlken aýylǵa uqsap barady.
Bul jaǵynan oblystyń basqa óńirleri de maqtana almaıdy.
Kúni keshe Túrkistanda «О́ńirlerdi damytý» baǵdarlamasymen 5 qabatty 8 turǵyn úı paıdalanýǵa berildi. Bul kúni baspana kezeginde turǵan jáne áleýmettik jaǵynan az qorǵalǵan 480 otbasy baspanaly bolǵan. «Otyrar» dep ataý berilgen shaǵyn aýdandaǵy qonys toıǵa qatysqan oblys basshysy:
– Elbasynyń tapsyrmasymen búginde elimizdiń árbir aımaǵynda túrli baǵdarlamalar aıasynda turǵyn úıler salynyp jatyr. Búgin, mine, Memleket basshysynyń kóregen saıasatynyń nátıjesin kórip, onyń kýási bolyp otyrsyzdar. Kóp jyldar boıy kezek kútken otbasylar búgin bir-bir shańyraqqa ıe boldy. Bir kúnde 480 páterdiń berilýi bir Túrkistan emes, oblysymyz úshin úlken oqıǵa dep aıtýǵa bolady. Endi munda jańadan 480 otbasy, ıaǵnı úsh myńdaı azamat ómir súretin bolady. Jańa qonystaryńyz qutty bolsyn, árbir shańyraqqa birlik pen bereke tileımin, – dedi.
О́tken jyly osy shaǵyn aýdanda 120 páterli 2 úı jáne QIK esebinen 144 páter paıdalanýǵa berilgen bolatyn. Al 480 páterli kóp qabatty segiz úı «О́ńirlerdi damytý» baǵdarlamasy aıasynda oblys bıýdjetinen bólingen 3 mlrd 109 mln teńge qarjyǵa salynǵan. Munda qonystanǵan otbasylardyń balalary úshin qazirgi kúnde balabaqsha, mektep máselesin sheshý qarastyrylyp otyr. Ol úshin jergilikti bılik memleket-jekemenshik áriptestigi aıasynda 280 oryndyq balabaqsha qurylysyn bastamaq. Al keler jyly osynda 900 oryndyq jańa mektep ǵımaratynyń qurylysy júrgiziletin bolady. Bul qurylystardan basqa jańa aýdanda 200 oryndyq balalarǵa arnalǵan psıhologııalyq-túzetý ortalyǵy salynýda.
Sonymen birge, qaladaǵy 5 myńǵa jýyq azamattyń turǵyn úıge degen suranysyn qanaǵattandyrý maqsatynda «Otyrar» shaǵyn aýdanynan Qazaqstan ıpotekalyq kompanııasy arqyly taǵy da 6 úıdiń qurylysy júrgizilmek. Keler jyly josparlanǵan 20 kóp qabatty turǵyn úı salynsa, odan bólek 150 kottedj turǵyzylady. Sonymen qatar, Túrkistan qalasynyń ákimshilik-iskerlik ortalyǵy da osy shaǵyn aýdanda boı kóteredi.
Búginde turǵyndar úshin kommýnaldyq tólemder qymbatqa túsip turǵany belgili. Memleket basshysy sheteldik ınvestorlardy elge keltirý úshin elektr jaryǵy, jylý jáne sý baǵalaryn kóterý qajettigin aıtqan bolatyn. Ondaı jaǵdaıda Reseıdiń kommýnaldyq qyzmet baǵasy elimizben salystyrǵanda tórt ese qymbat bolǵanymen, «aryq atqa qamshy aýyr» degenniń keri keledi.
Bıylǵy tamyz aıynyń basynda oblys ákiminiń qoldaýymen bir top jýrnalıst Túrkııada issaparda bolyp kelgen. Syrt kóz – synshy. Baıqaǵanymyz, Túrkııanyń kóp qabatty úıleriniń deni balamaly qýat kózderin jaqsy paıdalanady eken. Bıik úı shatyryna ornatylǵan sý bóshkeleri kún qýatymen jylytylady. Jylý máselesin de tıimdi sheshken.
Oblys basshysy aldyńǵy kezekte Shymkenttegi kóp qabatty úılerge sý jylytý qondyrǵylaryn ornatýdy tapsyryp otyr. Bul «jasyl» ekonomıka, balamaly qýat óndirýdiń alǵashqy baspaldaǵy. Tapsyrma óz deńgeıinde oryndalǵan jaǵdaıda kommýnaldyq tólemder eldiń qaltasyn onshalyqty qaqpaıtyn bolady.
Baqtııar TAIJAN,
«Egemen Qazaqstan»
Ońtústik Qazaqstan oblysy
