Osyndaı keıbir kereǵarlyqtyń aldyn alý úshin sońǵy kezderi oblys ortalyǵynda kóshe merekelerin ótkizý úrdisi qolǵa alyndy. Bul is-sharalar tek qur dúrmek pen konserttik nómirlerdi qyzyqtaý úshin ótkizilmeıdi. Nemese belgili bir qolóner buıymdaryn turǵyndardyń nazaryna usyný úshin jasalmaıdy. Sóz joq, kóshe merekeleri kezinde ony odan ári kórkeıtý men abattandyrý máseleleri talqylanady. Ony sheshýdiń joldary ortaǵa tastalady. Buǵan qosa kóshe merekesiniń budan da góri tereńirek mánisi bar deýge bolady.
Eń aldymen kóshe merekesiniń mazmun men túr jaǵynan tyǵyz úılesim tabýyna jaǵdaılar jasalady. Kóshe esimi berilgen qaıratkerdiń kim bolǵany, osy topyraqqa qatysy men oǵan shapaǵatyn tıgizgeni jóninde keń aýqymdy túsinik jumystary júrgiziledi. Buǵan esimderi elge tanymal tarıhshylar men ólketanýshylar, onomastıka men til salasynda eńbek etip júrgen ǵalymdar men lıngvıst mamandar qatysady.
− Kóshelerge usynylǵan ataýlarǵa saraptama memlekettik mekeme arqyly júrgiziledi. Odan keıin ony respýblıkalyq onomastıkalyq komıssııa músheleri bekitedi. Qaıtkende de kóshelerge ataý berý jóninde keshendi kózqaras ustanǵandy jón kóremiz. Osyndaı qaǵıdat keıingi kezderi dástúr men tájirıbege ene bastaǵan kóshe merekelerine de tán. Ondaǵy ashyq áńgimeden soń keıbir ekiushty oı men kózqaras týǵyzyp júrgen máseleler de óz yńǵaıyn taba bastaǵanyna kóz jetkizip kelemiz, − dedi gazet tilshisine Aqtóbe oblystyq tilderdi damytý basqarmasynyń basshysy Gúlaıym Tólebaeva.
Jergilikti Til basqarmasy basshysynyń málimdeýinshe, jańa kóshelerge tek qazaq ultynan shyqqan tulǵalardyń esimderin berý shart emes. Kerisinshe, Aqtóbe qalasynda osy eldiń dańqyn asyrǵan ózge ult ókilderiniń atyndaǵy kóshe ataýlary jetkilikti. Ony Nıkolaı Onotrıenko, Mıhaıl Prohorov, Alekseı Marısev jáne Vıktor Pasaev dep jalǵastyra berýge bolady. Bulardyń alǵashqylary Keńes Odaǵynyń batyrlary bolsa, keıingisi Aqtóbe aımaǵynda týyp-ósken ǵaryshker ekeni kópshilikke belgili, dedi ol odan ári.
Aqtóbe kún saıyn ósip-órkendep, qanatyn keńge jaıyp kele jatqan respýblıkanyń batys óńirindegi iri qala. Munda jańadan boı túzep jatqan kósheler men oramdar jáne shaǵyn aýdandar jeterlik. Qazir ataý áli berile qoımaǵan 200-ge tarta kóshe bar. Aqtóbelik kóshe janashyrlary onyń bárine kósheli kózqaras turǵysynan kelýdi kózdeıdi.
Temir QUSAIYN,
«Egemen Qazaqstan»
AQTО́BE
