Aýyly aralas, qoıy qoralas jatqan «Egemen» men «Kazpravda» gazetteriniń Almaty bólimshesinde múddesi bir eki ujymnyń jýrnalısteri qashannan ádettegideı biriniń bólmesine biri bas suǵyp, kirip-shyǵyp, esikteri jabylmaı jatady. Sheraǵańnyń taıaý kúnderi 85 jasqa tolatyny qarsańynda «Kazpravdanyń» Almatydaǵy bólimshesiniń ataqty fototilshisi Iýrıı Bekkerge baryp, «Al Iýreke, qorjynnyń túbin qaq! Erekshe sýret bolsa qalap alaıyq...» dedik. Kásibı fotojýrnalıstiń kózi shyradaı jandy. «Sheraǵa, Sheraǵa... umytpasam mende bir tamasha sýret bar!». Kompıýterdiń pernetaqtasyn toqyldata basa otyryp, tapty-aý aqyry! «Bul sýretti 1999 jyly kúzde respýblıkalyq «Sport» gazetiniń júldesi úshin tapanshadan nysana kózdeýden ótken qalalyq jarysta túsirip em» dedi jadyrap. Qas-qaǵym sátti kóziniń qıyǵynan qur jibermeıtin fotomergen áńgimeni ári qaraı bylaı jalǵady.
– Ataqty Sheraǵa ol tusta ózimizdiń «Egemen Qazaqstanda» eńbek etip júrdi. Qazaqstandaǵy jalǵyz sporttyq gazettiń júldesi úshin ótken jarysta qazylar alqasy tóraǵasynyń mindetin atqardy. Mergenderge ádil baǵasyn berdi. О́z basym memleket qaıratkeri, Joǵarǵy Keńestiń depýtaty, Bas redaktor Sherhan Murtaza kenet qolyna tapansha alyp nysana kózdeıdi dep oılamappyn. Ilki sátte kánigi sportshylarmen qatar tura qalyp, tapanshanyń shúrippesin basyp-basyp salǵanda talaı-talaı áriptester, sportshylar, mınıstrlik qyzmetkerleri bastaryn shaıqap tamsanyp, Sheraǵany ábdan qolpashtap, qolyn qysty. Áli esimde, kórsetkishi de tómen shyqpady. Myna sýret sol bir sátten kórinis.
– Sheraǵanyń Máskeý memlekettik ýnıversıtetinde oqyǵan stýdenttik shaǵynda orta salmaqta bokstan fakýltet namysyn qorǵaǵanyn bilmeýshi me edińiz?
– Solaı ma, al kerek bolsa, bilmeıdi ekenmin... Biraq tapanshany qolyna alǵan Sheraǵa sportshylarǵa tán salmaqty minezben bir kózin qysyp, boıyn tik ustap tura qalǵanda ishim birdeńe sezgendeı kúıge túsip edi...
Sheraǵań bılıard ústelinde de mergendigimen tanylǵan, dep jáne aıttyq. Fotomergendi kezinde «Egemen Qazaqstannyń» Bas redaktory qyzmetin atqarǵan dańqty Sherhan Murtazanyń 85 jasqa tolýyna oraı redaksııanyń bılıardtan týrnır ótkizetindigi jaıly da qulaǵdar ettik.
Halyq jazýshysynyń sportqa qyryn qaramaǵanyna kýá bolǵan Iýrıı Zelmanovıch «Ol jarysqa mindetti túrde qatysamyn...» dep keń dálizdi basyna kóterip aıqaılap bara jatty. Jarasymdy-aq. Kádimgi gazet tilshisiniń qyzmetine saı tosynnan ushyrasyp qalatyn shynaıy qýanyshy...
Talǵat SÚIINBAI,
«Egemen Qazaqstan»
ALMATY
Sýrette: Sherhan MURTAZA (Almaty, 1999 jyl)
Sýretti túsirgen
Iýrıı BEKKER
