Onyń aıtýynsha, aýyr qylmysy úshin Embi qalasyndaǵy túzetý kolonııasynda jazasyn óteýshi radıkaldy kózqrasynan qaıtyp oń jolǵa betbura bastapty. Onyń takfırlik ustanymynan bas tartýyna dintanýshy qalamger-qajy Smaıyl Seıitbekovtyń mázhabtar tarıhy atty kitaby sebebshi bolypty.
Jazasyn óteýshi dinı aǵartýshylyq sıpatta jazylǵan osy súbeli eńbekti abaqtyda birneshe ret qaıtalap oqyp shyǵypty. Sodan keıin ol dinı túsiniginiń tarlyǵy men osy baǵyttaǵy oı-órisiniń kemdiginen úkimderdiń birqataryn jańsaq, teris túsinik kelgendigin moıyndaýǵa májbúr bolady. Ári buǵan deıin qatelesip kelgenin túsinedi.
Ekinshiden sottalýshy jáne onymen túsindirý jumystaryn júrgizip júrgen teolog Erbolat Júsipov ekeýiniń arasynda ózara túsinistik ornyǵa bastaıdy. Naqtyraq aıtqanda, jazasyn óteýshi namaz oqymaǵannyń bárin kápir dep aıyptap kelgen. Alaıda «Mázhabtar tarıhy» atty qundy kitaptaǵy ýahabılik aǵymnyń qalaı paıda bolǵany jónindegi taraýmen tanysqannan keıin o bastaǵy baǵytynan bas tartady. Ári ol din jolyna betburýshy ózge jandardyń óz qatelegin qaıtalamaýyn ótinedi. Sonymen birge soqyr senimniń sońynan kózsiz erip ketpeı, kez kelgen jaǵdaıda parasat pen paıymǵa arqa súıeý kerektigin aıtypty.
Adasqannyń aıyby joq, qaıtip úıirin tapqan soń degen halyqtyq qaǵıda da dál osyndaı jaǵdaıda aıtylsa kerek.
Temir QUSAIYN,
«Egemen Qazaqstan»
Aqtóbe oblysy
