Baıanaýylǵa saparymyzda taý baýraıynda otyrǵan aýyldarǵa da baryp qaıtamyz. Bir Aqsańnyń ózi aınala qaptaǵan qalyń taýly kórikti tabıǵattyń ortasynda. Kórkemdigin saqtap, durys kózqaraspen qarasa, jazǵy-qysqy týrızmge suranyp-aq turǵan jer. Sabyndykóldiń jaǵasyndaǵy respýblıkalyq mańyzdaǵy úlken jol taý ishimen júrip otyryp, Aqsań aýylyna alyp keledi.
– Aýdannyń turǵyn úı-kommýnaldyq sharýashylyǵy bóliminde jobalaý-smetalyq qujat daıyn, qarajat máselesi sheshilse, kútip turǵan aýyl joly da jóndelip qalar, – dedi aýyl ákimi Kenjebek Dúısenbaev.
Aýyl aýdan ortalyǵynyń irgesinde ornalasqan. Jalǵyzqaıyń, Qarajar aýyldaryn qosqanda Aqsań aýyldyq okrýginiń aýmaǵynda myńǵa jýyq halyq turady. Osy myńnyń 514-i jumysta, kópshiligi Baıanaýyl Ulttyq parkine qarasty orman sharýashylyqtarynda turaqty jáne maýsymdyq ýaqyttarda eńbek etedi eken.
Aýyl ákimi Kenjebek Dúısenbaev Ońtústik Qazaqstan oblysyna baryp, soltústikke keletin otbasylardyń bir-ekeýin Maqtaaral aýdanynan Baıanaýyldyń Aqsańyna kóshirip alyp kelipti. Aldaǵy ýaqytta taǵy da baryp, birneshe otbasyn kóshirip ákelý maqsaty bar. Kóship kelgen Beıbitjan men Álimjannyń otbasylary qazirdiń ózinde jer alyp, jylyjaı ashyp, kókónis ósiremiz dep daıyndalýda.
Aýyl balalarynyń oqyp-bilim alýlaryna barlyq jaǵdaı jasalypty. Qalyń qarly, tabıǵaty ǵajap Myrzashoqy baýraıynda ósken aýyl balalary shetinen shańǵyshy kórinedi. Aýdan boıynsha ótetin qysqy sporttyq jarystarda úsh aýyldyń sportshylary júldeli oryndardy ıelenip júr eken. Jelaıaq jas shańǵyshylar Oljataı Muratbek, Maral Ismaılovanyń, eresekter arasynda Araılym Sembekova, Tólegen Tóleýbaevtyń esimderi únemi úzdikter qatarynda atalady.
Bir ókinishtisi, shaǵyn mektepterde bala sanynyń azaıý mysaldary Baıanaýyl aýyldarynyń bárinde kezdesedi. Aqsańda byltyr bar-joǵy 7 oqýshy mektep bitiripti. Sondyqtan aýyl ákimdigi aldaǵy ýaqytta taǵy da ońtústik óńirden birneshe otbasyn kóshirip ákelýdi josparlap otyr.
Myrzashoqy – Qararjar aýyly mańynda, taýdaǵy shańǵy kesheni osy jerden ashylmaqshy. Qysqy týrızmdi qolǵa alǵandar endi taý-tasty qazyp, jol jasamaq. Aýyl turǵyndary da shańǵy keshenin turǵyzýǵa qatysyp, jumysqa alynypty. Taý baýraıyndaǵy tynyshtyqty qurylys daýysy buzǵandaı. Bıik taýǵa elektr energııasyn tartyp, joldy jóndeýdi aıtpaǵannyń ózinde, Myrzashoqyǵa basqa da ınfraqurylymdar tartylmaq. Biz kelgende Túrkııadan oryndyqtary bar arqan jol ákelinip, qurastyrylyp jatyr eken. Bıiktigi bir shaqyrymdy quraıtyn taýdan 800 metr tómenge qaraı syrǵanaıtyn arnaıy jol salynýda. Iаǵnı, aldaǵy ýaqytta úsh aýylǵa týrıster kele bastaıdy. Bul – aýyl úshin jumys kózi. Myrzashoqynyń áleýeti artady.
Taý baýraıyndaǵy aýyldardyń áleýmettik-turmystyq jaǵdaılary da týrıstik áleýetpen jarasym tabar. Týrızmnen túser paıdanyń arqasynda Jalǵyzqaıyń aýylynyń balalaryn mektepke tasymaldaýǵa jańadan avtobýs alynyp, Qarajar aýylyna shaǵyn mektep salyp berip, ábden eskirgen sý qubyrlary, joldary jóndelip, Aqsań aýyldyq okrýginiń eńsesi kóterilip, bir jańaryp qalar degen oıdamyz.
Farıda BYQAI,
«Egemen Qazaqstan»
Pavlodar oblysy,
Baıanaýyl aýdany
