Irgeli jıynǵa elimizdiń túkpir-túkpirinen aqparat maıdanynyń maıtalmandary men tanymal tulǵalar qatysty. Aptalyq barysynda medıa salasyndaǵy mańyzdy máseleler talqylanyp, túrli usynystar jasaldy.
Aptalyq aıasynda uıymdastyrylǵan «Kontent-Market» dep atalatyn arnaıy sessııa kezinde 15 qazaqstandyq, 7 sheteldik telearna men 90 prodakshn-kompanııanyń ónimderi tanystyryldy. Budan bólek, aptalyqtyń alǵashqy kúni «Astana PR kúni» atty konferensııa ótti. Jıyn barysynda PR trendter jáne kommýnıkasııa vektorynyń ózgerýi sóz boldy. PG Communications kompanııasynyń bas dırektory jáne Qoǵammen baılanys jónindegi ulttyq assosıasııa keńesiniń tóraıymy Ásel Qaraýylova kommýnıkasııany damytýdy júıege túsirý kerek ekenin tilge tıek etti. Onyń aıtýynsha, mundaı jıyndar PR mamandar men baspasóz hatshylarynyń kásibı deńgeıin kóteredi. Konferensııada taım-menedjment, emosııalyq kúıiný jáne KPI kórsetkishin kóterý sekildi kommýnıkasııa salasynyń mańyzdy taqyryptary tóńireginde aýqymdy pikirtalas ótti.
Jıynnyń ekinshi kúninde de birqatar mańyzdy basqosýlar ótti. Astana Digital Forum dep atalatyn sharadan bastalǵan kún buqaralyq aqparat quraldary jýrnalısteriniń biliktiligin arttyrýǵa arnalǵan semınarlarmen jalǵasty.
Forýmda sıfrly tehnologııalarǵa qatysty kún tártibinde turǵan birqatar máseleler sóz boldy. Qazirgi tańda sıfrly tehnologııanyń jaǵdaıyn baǵamdaý óte qıyn. Qazaqstan tarapynyń osy jahandyq úderiske ilesýi jáne ondaǵy keleli máselelerdi talqylaýy elimizdiń baǵyty durys ekenin kórsetedi. Shalǵaı aýyl turǵyndarynyń sıfrly tehnologııaǵa erkin qol jetkizýi básekege qabiletti bolýǵa múmkindik beredi. Jıyn barysynda 2021 jylǵa qaraı taǵy eki mıllıon turǵyn ınternetke qosylatyny aıtyldy.
Is-sharada memlekettik tilge qatysty máseleler de sóz boldy. Qazaqsha Ýıkıpedııanyń negizin salýshy Nurtaı Áshimniń sózine súıensek, bıyl ana tilimizdegi kontentke suranys kóbeıgen. Sondyqtan ǵalamtordaǵy qazaqsha materıaldardy kóbeıtý ýaqyt kúttirmeıdi. N.Áshimniń aıtýynsha, keıingi ýaqytta ana tilimizdegi Ýıkıpedııany oqıtyndar sany 35 paıyzǵa kóbeıgen.
Qazaq tilindegi kontentti kóbeıtý máselesi aptalyqtyń alǵashqy kúni de sóz boldy. «Astana» arnasynyń bas dırektory Lázzat Tanysbaı áriptesterin ana tilimizdegi ónimderdi kóbeıtýge shaqyrdy. Onyń pikirinshe, qazirgi tańda qazaqsha ónimge suranys joǵary. «Bolashaq» korporatıvti qorynyń dırektory Dınara Sháıjúnisova da Shoqan men Abaıdyń tilindegi materıaldardy kóbeıtý kerek dep esepteıdi. Onyń sózine saı, Disney sekildi alpaýyt kompanııalardyń ónimderin qazaq tiline aýdaryp, otandyq telearnalardan kóptep kórsetý kerek.
Medıaaptalyq aıasynda qazaq tildi buqaralyq aqparat quraldaryna arnalǵan biliktilik semınarlary ótti. Eki bólikten quralǵan sharada aqparat tekserý, jańa medıanyń tıimdi quraldary jáne konvergenttik jýrnalıstıka sekildi máseleler tóńireginde sóz boldy.
Biliktilikti arttyrýǵa arnalǵan semınarda jýrnalısterge kerekti birqatar kómekshi quraldar tanystyryldy. Medıa trenerlerdiń sózine súıensek, Google kompanııasynyń ónimderi medıa salasynyń mamandaryna óte qajet. Sondaı-aq is-shara barysynda jýrnalısterdiń jalǵan aqparatqa qarsy qalaı kúresýi kerek ekeni de aıtyldy. Youtube, Google sekildi saıttardy paıdalanyp, feık jańalyqpen kúresýdiń joldary tanystyryldy.
Aptalyqtyń sońǵy kúni óńirlik buqaralyq aqparat quraldarynyń forýmy ótti. Jıynǵa Aqparat jáne kommýnıkasııalar mınıstri Dáýren Abaev pen Májilis depýtaty Saýytbek Ábdirahmanov qatysty. Elimizdiń túkpir-túkpirinen kelgen jýrnalısterdiń jıynynda mınıstr «Astana Media Week» sekildi kólemdi sharanyń elimizdegi medıa salasyn damytatynyn atap ótti. Sonymen qatar vedomstvo basshysy BAQ salasynda atqarylyp jatqan birqatar jumystarǵa toqtaldy. Onyń aıtýynsha, qazirgi tańda respýblıkalyq jáne óńirlik buqaralyq aqparat quraldarynyń ózara áriptestik ornatýy jańartylmaq. Soǵan sáıkes aımaqtaǵy medıa quraldary respýblıkalyq áriptesterinen emin-erkin materıal almasa alady.
Forým barysynda aımaqtyq BAQ-tarǵa jáne jýrnalıstıka salasynyń kún tártibindegi máseleleri aıtyldy. «Qazaqstan» telearnasynyń basshysy Erlan Qarın telearnalar men ınternet quraldary arasynda aýdıtorııaǵa tartys júrip jatqanyn sóz etti. «Bolashaq jastar» gazetiniń redaktory Dáýren Babamuratov ınternet saıttary reıtıng pen sensasııa qýalap, aqparattyń negizgi bóligi nazardan tys qalǵanyna toqtaldy. Ol atalǵan saıttardyń basshylyǵyn osy máselege nazar aýdarýǵa shaqyrdy.
Aptalyqtyń qorytyndysy retinde eldegi birqatar baspasóz qyzmeti marapattaldy. Osyǵan saı «Eń úzdik baspasóz qyzmeti» atalymy boıynsha Investısııalar jáne damý mınıstrligi top jardy. Al jergilikti atqarýshy organdar arasynan Batys Qazaqstan oblysynyń baspasóz qyzmeti eń úzdik dep tanylsa, kompanııalar arasynda «Qazaqstan temir joly» aksıonerlik qoǵamynyń asyǵy alshysynan tústi. Korporatıvtik saıttar arasynda Astana qalasy ákiminiń baspasóz qyzmeti ozyq shyqty. «Kásibı moıyndalý» atalymynda Ishki ister mınıstrligi Tótenshe jaǵdaılar komıtetine teń keler eshkim bolǵan joq. Syrtqy ister mınıstrliginiń baspasóz hatshysy Ánýar Jaınaqov jyldyń eń úzdik baspasóz hatshysy dep tanyldy.
Aptalyqqa qatysqan mamandar mundaı is-sharanyń qatysýshylarǵa ozyq tájirıbelermen tanysyp, sheberlik shyńdaýǵa jáne jańa tehnologııalardy el ıgiligine paıdalanýǵa berilgen úlken múmkindik ekenin sóz etti. Sonymen qatar jıynnyń medıa salasyndaǵy seriktestik qatynastar men halyqaralyq yntymaqtastyqty damytýǵa eleýli úles qosatynyna senim bildirdi.
Abaı ASANKELDIULY,
«Egemen Qazaqstan»
