Jıynǵa Parlament Senatynyń Tóraǵasy Qasym-Jomart Toqaev, Qazaqstan Syrtqy ister mınıstri Qaırat Ábdirahmanov, Reseı Syrtqy ister mınıstri Sergeı Lavrov, atalǵan oqý ornynyń rektory Anatolıı Torkýnov, halyqaralyq deńgeıdegi saıası tulǵalar men qoǵam qaıratkerleri, dıplomattar jáne oqý ornynyń túlegi retinde álemniń túrli salasynda júrgen bıznes-qaýymdastyq ókilderi qatysty.
Alqaly jıyndy ashqan Parlament Senatynyń Tóraǵasy Q.Toqaev dıplomatııalyq qyzmette bilikti mamandar daıarlaýda bul oqý ornynyń mańyzy joǵary ekendigin aıta kelip, Memleket basshysy Nursultan Nazarbaevtyń forým qatysýshylaryna arnaǵan quttyqtaý hatyn oqyp berdi.
«Máskeý memlekettik halyqaralyq qatynastar ınstıtýty túlekteriniń tórtinshi halyqaralyq forýmyna qosh keldińizder. Búgin Astanada halyqaralyq qatynastar salasynda álemdik deńgeıde bilikti mamandardy daıyndaıtyn bedeldi joǵary oqý orny túlekteri bas qosyp otyr. Ýnıversıtet saıası, qoǵam qaıratkerleri, dıplomattar, jýrnalıster, kásipkerler syndy sańlaqtar tobyn daıyndaýda Alma-mater bolyp sanalady. Bul ınstıtýt TMD elderinde ǵana emes, alys shetelde de joǵary bedelge ıe. Osy joǵary oqý ornynda zaman talabyna saı jan-jaqty, tereń bilim alýǵa bolady. Qazirgi tańda álemdik saıasattaǵy, ekonomıkadaǵy, qoǵamdyq ómirdegi týrbýlentti jaǵdaılarda halyqaralyq qatynas mamandaryna degen jaýapkershilik arta tústi. Sondyqtan oqý ornynyń aldaǵy ýaqyttarda atqaratyn qyzmetiniń mańyzy zor. Atalǵan forýmdy uıymdastyrý jaqsy dástúr dep sanaımyn. Onda túlekter álemdegi ózekti máseleler jóninde ózara pikir almasa alady. Barlyqtaryńyzǵa forýmda jáne aldaǵy qyzmetterińizde sáttilik tileımin», dep jazylǵan N.Nazarbaevtyń hatynda.
Sondaı-aq forýmǵa qatysýshylar aldynda sóz sóılegen Reseı Syrtqy ister mınıstri S.Lavrov ta Qazaqstannyń bas qalasyna joǵary baǵa bergen Reseı prezıdenti Vladımır Pýtınniń arnaıy hatyn oqyp berdi. Onda V.Pýtın Qazaqstannyń qazirgi Astanasy kópjaqty dıplomatııanyń ortalyǵyna aınalǵanyn atap ótken.
«Máskeý memlekettik halyqaralyq qatynastar ınstıtýty túlekteriniń tórtinshi halyqaralyq forýmynyń ashylýymen quttyqtaımyn. Osy jyly jıynǵa ár elden qonaqtar keldi. Memlekettik vedomstvo qyzmetkerleri, dıplomattar men ǵalymdar ári halyqaralyq qatynas mamandaryn Astana qalasy kútip aldy. Astana – kóp jaqty dıplomatııanyń, halyqaralyq ekonomıkalyq qarym-qatynastyń ári eýrazııalyq ıntegrasııa ortalyǵynyń biri bolyp sanalady», dep jazylǵan Reseı prezıdentiniń quttyqtaýynda, forýmdy uıymdastyrǵany úshin Elbasyna jáne qazaqstandyqtarǵa zor alǵysyn bildirgen.
О́z kezeginde Qazaqstannyń Syrtqy ister mınıstri Q.Ábdirahmanov MMHQI túlekteri halyqaralyq qatynastar salasynda ashyq dıalog pen kásibı dıplomatııalyq baılanystardyń damý jolynda qomaqty úles qosyp kele jatqanyn atap ótti. Al Máskeý memlekettik halyqaralyq qatynastar ınstıtýtynyń rektory A.Torkýnov bolsa, osymen tórtinshi ret uıymdastyrylyp jatqan aýqymdy sharanyń oıdaǵydaı ótýine atsalysqan tarapqa zor alǵysyn bildirdi.
Aıta keteıik, paneldik sessııalar aıasynda kúni boıy jalǵasyn tapqan forým qatysýshylary «Jahandyq saýda, jańa qoldaýlar men EKSPO sabaqtary», «Integrasııalyq túıisýdegi Qazaqstan tájirıbesi» jáne «25 jyldan keıingi postkeńestik qoǵam. Bilim men mádenıet salasyndaǵy áriptestik» taqyryptarynda oı bólisip, pikir almasty.
Nurlybek DOSYBAI,
«Egemen Qazaqstan»
