Jaqynda oblystyq týrızm jáne syrtqy baılanystar basqarmasy halyqaralyq týrızm kúnine oraı óńirdiń týrızm salasyn órge súırep júrgen uıymdar men aýdandarǵa qurmet kórsetip, birneshe atalym boıynsha marapattady. «Úzdik týrıstik operator», «Úzdik týrıstik nysan», «Úzdik týrıstik baza», «Úzdik týrıstik baǵyt», «Úzdik qonaqúı», «Úzdik meıramhana», «Úzdik qolónershi», «Úzdik týrıstik shara», «Jyl jańalyǵy», «Jyl jobasy», «Jyl seriktesi» sekildi atalymdarmen daralanǵandardy oblys ákiminiń birinshi orynbasary Nurymbet Saqtaǵanov quttyqtady. «Sońǵy eki jylda oblys aýmaǵyndaǵy týrıstik baǵyttardaǵy avtomobıl joldaryn jóndeýge 4 mıllıard teńgege jýyq qarjy bólindi. Bular – Alakól men Sibe kólderine jáne Nurtaý, Altaı Alpisi demalys bazalaryna, Katonqaraǵaı aýdanyna aparatyn joldar. 2015-2016 jyldary óńirde týrıstik nysandardy salý boıynsha 682 mıllıon teńgege 19 ınvestısııalyq joba júzege asyryldy. 2023 jylǵa deıin aımaqta quny 18 mıllıard teńgeni quraıyn 26 jobany iske asyrý josparlanyp otyr. Jergilikti atqarýshy organdar tarapynan ınfraqurylymdy jasaqtaýǵa az kóńil bólinip jatqan joq, sizder de týrısterdi tartý baǵytynda aıanbaı jumys isteýge tıissizder», - dedi oblys ákiminiń birinshi orynbasary.
Bıyl «Úzdik týrıstik nysan-2017» atalymyn Úrjar aýdany ıelendi. Aǵymdaǵy jyly atalǵan aýdan aýmaǵyndaǵy Alakólge týrısterdiń aǵylyp kelip, sany eki esege deıin arta túskeni belgili. «Bıyl bizdiń aýdan úshin erekshe jyl boldy. Alakól jaǵasyn abattandyrýǵa oblystyq bıýdjetten 500 mıllıon teńge qarjy bólinip, demalys orny adam tanymastaı ózgerdi. Kelesi jyly da abattandyrý, kóriktendirý jumystary jalǵasady. Eń úlken jańalyq, 2018 jyly kól basyna deıin poıyz júrgizý josparlanyp otyr», - deıdi Úrjar aýdany ákiminiń orynbasary Jarqynbek Baısabyrov.
Sonymen qatar Nurymbet Saqtaǵanov «Shyǵys-Batys» meıramhana saraıynyń dırektory Muhtar Toıbazarovqa, «Baıan» pantymen emdeý fılıalynyń dırektory Baıan Bashevaǵa, «Klımovka» demalys bazasynyń dırektory Vladımır Klımovqa, Katonqaraǵaı ulttyq parkiniń dırektory Erlan Mustafınge jáne «Merıdıan» týrıstik fırmasynyń dırektory Aıman Jakýpovaǵa «Shyǵys Qazaqstannyń týrızm salasyn damytýǵa qosqan úlesi úshin» Alǵys hatyn tapsyrdy.
Azamat QASYM,
«Egemen Qazaqstan»
О́SKEMEN
