Qoıylymnyń qoıýshy-rejısseri – «Astana Mıýzıkl» teatrynyń kórkemdik jetekshisi, «Qazaqkonsert» MKU dırektory, Qazaqstannyń eńbek sińirgen qaıratkeri Ashat Maemırov. Qoıylym avtorlary – Qazaqstannyń eńbek sińirgen qaıratkeri Baqyt Qaıyrbekov jáne Artýr Orenbýrgskıı. Mıýzıkl barysynda Abaı Qunanbaevtyń, sondaı-aq Arystanbek Muhamedıuly, Aqtoty Raıymqulova, Qaırat Baekenov jáne Hamıt Shańǵalıevtyń týyndylary oryndaldy.
Atalǵan mıýzıkl adamzatqa ortaq uly – sezim mahabbat taqyrybynda órbıdi. Qazaqstanda ótetin án baıqaýyna qatysýǵa kelgen shetel qazaǵy Janar men Nurjannyń mahabbatyna, endi birde kóp jyldar buryn týǵan jerden qol úzýge májbúr bolǵan Janardyń atasy Hamıt aqsaqaldyń elge, jerge degen saǵynyshyna aınalyp sahna tórinen ún qatady. Qoıylym rejısseri Ashat Maemırovtyń aıtýynsha, mıýzıkldiń «Astana – meniń mahabbatym» dep atalýynda da úlken mán bar.
«Sebebi taǵdyrdyń buralań joly jyraqtatyp jibergen san taǵdyrlar ásem qala Astanada toǵysady. Astana – oryndalar asyl armandardyń, jarqyn bolashaqtyń qalasy. Astana – bizdiń táýelsizdigimizdiń sımvoly. Osy rette Parıj sııaqty mahabbattyń, adamzatqa ortaq barsha asyl sezimderdiń ordasyna aınaldyrýymyz kerek», deıdi ol.
Shyny kerek, qoıylymnyń taqyrybyna qarap, kórkem shyǵarmadan góri saıası naýqan lebi basym kóringen. Alaıda daýys pen qımyl-qozǵalys dramatýrgııasy, maǵynaly ssenografııa men kostıýmder qoıylymdy kóńildi ete túsken mıýzıkldiń mazmuny áldeqaıda aýqymdy ekenin baıqadyq. Sonymen birge vokal men plastıkanyń ózara úılesimi, bir sát te toqtamaıtyn tartys pen jastyq energetıkasy zal ishin kernedi. Qazaqstandaǵy mıýzıkl janrynyń qalyptasýy men damýy úshin ter tógip júrgen talantty ujym ózderin jańa qyrynan kórsetýge baryn salyp keledi.
Aıa О́MIRTAI,
«Egemen Qazaqstan»
Sýretterdi túsirgen Erlan Omar,
"Egemen Qazaqstan"
