Týrnırge Astana, Almaty qalalary men 14 oblystan 96 palýan qatysady. Ashyq týrnır erejesine sáıkes arlandar saıysyna 18 ben 29 jas aralyǵyndaǵy JOO stýdentteri jáne sport klýbtarynyń jas sportshylary qatysa alady.
Sportshylar Olımpıada júıesi boıynsha úsh salmaq kategorııasynda (60 kg, 74 kg, +90 kg.) kúresedi. Ár salmaq kategorııasynyń jeńimpazdary men júldegerleri aqshalaı syılyqtar, medaldar jáne gramotalarmen marapattalady. Sonymen qatar, 60 kg salmaǵyndaǵy sportshylardy kóterý jáne qoldaý maqsatynda jeńimpazǵa jeńil avtokólik syıǵa tartylmaq.
Elbasy N. Nazarbaevtyń tapsyrysymen 2017 jyl «Jastar jyly» dep jarııalanǵan bolatyn. «Arlandar saıysy» ulttyq sportty jastar arasynda nasıhattaý arqyly patrıottyq sezimdi damytý, halyqaralyq arenada qazaq kúresiniń bedelin joǵarylatý, orta jáne jeńil salmaqty palýandardyń sheberlikterin damytý maqsatynda júzege asyrylmaq.
Respýblıkalyq týrnırdiń ashylý saltanatynda kórermender nazaryna qazaq kúresiniń paıda bolý jáne damý jolyn sıpattaıtyn teatrlandyrylǵan qoıylym usynylady. Sonymen qatar, ulttyq namys pen jigerdi oıatatyn rýhty ánderimen kópshilikke keńinen tanymal «Seriler», «Alashuly» toptary jáne Qajymurat Sheshenqul syndy ánshiler óner kórsetedi. Týrnır saǵat 10:00-de bastalady.
Aıgúl AHANBAIQYZY,
«Egemen Qazaqstan»
