Aýdarý jumystaryna kitaptyń avtory – QR Prezıdenti Keńsesiniń bastyǵy Mahmud Qasymbekovtyń ózi jetekshilik etti. Kitapta prezıdent Nursultan Nazarbaevtyń túrli qıyndyqtar men qyzyqty sátterge toly ómiri týraly, onyń Qazaqstanǵa tóngen qaýip-qatermen kúresi jaıly jazylǵan. Mátin Elbasynyń jeke muraǵatyndaǵy qujattarmen jáne sýrettermen tolyqtyrylǵan.
Ázerbaıjan tilindegi aýdarmaǵa alǵy sózdi Ázerbaıjan Respýblıkasy prezıdentiniń qoǵamdyq-saıası máseleler boıynsha kómekshisi, sol eldegi Prezıdent ákimshiliginde bólim basshysy, tarıh ǵylymdarynyń doktory, professor Álı Gasanov jazdy. Taǵdyry ortaq eki memlekettiń dostyq qarym-qatynasyn erekshe atap ótken Gasanov eki ulttyń ómirindegi kóshbasshylardyń róline toqtalǵan.
Gasanovtyń pikirinshe, Nursultan Nazarbaevtyń parasatty saıasatynyń jemisi retinde Qazaqstandaǵy turaqtylyqty, ulttar men etnostar arasyndaǵy tatýlyqty atap ótýge bolady. Qazaqstanda azamattyq beıbitshilik pen jalpyhalyqtyq izettilik jaǵdaıynda 130 astam halyqtyń ókili birge ómir súrip keledi. Solardyń qatarynda ázerbaıjan halqy da bar.
Kitapty orys tilinen aýdarǵan – Ázerbaıjan joǵarǵy medıapremııasynyń jáne Halyqaralyq Túrki Akademııasynyń Ismaıl Gasprınskıı atyndaǵy medıapremııasynyń laýreaty, jýrnalıst-pýblısıst Aıda Eıvazova. Konsýltanttar – Halyqaralyq Túrki akademııasynyń prezıdenti, professor Darhan Qydyráli jáne fılosofııa doktory, Mıllı Medjılıs depýtaty Djavanshır Feızıev. Redaktor – Velı Akperov.
