Bir qýantarlyǵy, bıylǵy báıgede tek elimizdiń ǵana emes, AQSh, Germanııa, Ýkraına, Reseı, Izraıl jáne Belorýs elinde turatyn avtorlar da baǵyn synaǵan. Júzden júırik shyǵyp jeńimpaz dep tanylǵan shyǵarma avtorlaryn saltanatty túrde marapattaý rásimi Almatydaǵy «Rixos Almaty» qonaqúıinde ótti. Uıymdastyrýshylardyń aıtýynsha «Altyn qalam» jobasynyń deńgeıi jyl sanap artyp keledi.
– Bıylǵy júlde biz úshin erekshe boldy. Olaı deıtin sebebimiz, «Alash» partııasynyń qurylǵanyna júz jyl tolýyna oraı «Alashordaǵa 100 jyl» atalymy jarııalandy. Satıra janry bıyldan bastap jazýshy, satırık, aýdarmashy Esenjol Dombaı atyndaǵy «Jyldyń úzdik satırasy» atalymy bolyp ózgertildi. Sonymen qatar, buǵan deıin 11 ret ótkizilgen balalar jazýshylaryna arnalǵan Halyqaralyq «Daraboz» baıqaýy bıyl birinshi ret «Altyn qalam» ádebı júldesi aıasynda ótip otyr. Bul balalar shyǵarmasyn qamtyǵan týyndylardyń sanyn ǵana emes, sapasynyń da artýyna septigin tıgizdi. Bizdiń arnaýly saıt arqyly árbir shyǵarma óz oqyrmanyn tapty dep esepteımiz – deıdi «Altyn qalam» ádebı júldesin uıymdastyrý komıtetiniń dırektory Kenje Jumanuly.
Bıyldan bastap alǵash ret taǵaıyndalǵan qazaqtan shyqqan alǵashqy mesenattardyń biri Esenqul Mamanov atyndaǵy syılyq Alashorda taqyrybyn qamtyǵan úzdik shyǵarmalarǵa berildi. Bas júldege tigilgen 1 mln teńgeni tarıhshy – jazýshy Elordalyq Ámirjan Álpeıisov ıelendi. Al, balalar jazýshylaryna arnalǵan «Daraboz» baıqaýynyń bas júldesi men 1 mln teńge kólemindegi qarjylaı syıaqy Qaraǵandylyq jazýshy Tóken Áljanteginiń enshisine buıyrdy. «Qazaq ádebıetine qosqan eleýli eńbegi úshin» syılyǵy Qazaqstannyń halyq jazýshysy Sherhan Murtazaǵa berildi. Sondaı-aq, «Jyldyń úzdik poezııasy» atalymynda Almatylyq Nurjan Nurbek úzdik dep tanylsa, «Jyldyń úzdik prozasy» atalymynda Ońtústiktik Qazaqstandyq Qarǵabaı Maqsat dara shyqty. «Jyldyń úzdik kıno ssenarııi jáne dramatýrgııasy» syılyǵyn Shymkenttik Jomart Aıdarov, «Jyldyń úzdik satırasy» Leńgirlik Eralhan Jylqyaıdarulyna, «Jyldyń úzdik fantastıkasy» Kentaýlyq Bekbolat Oralbekovke buıyrdy. Dál osyndaı atalymdar boıynsha arnaıy syılyqtar orys tildi avtorlarǵa da tabystaldy.
Eske salsaq, Qazaqstanmen qatar álemniń 6 memleketiniń jazýshylary baq synaǵan baıqaýǵa shyǵarmalar aqpan aıynyń 15 men qyrkúıektiń 15 aralyǵynda qabyldanyp, oqyrmandar ózine unaǵan shyǵarmaǵa ǵalamtor arqyly qazan aıyna deıin daýys bergen bolatyn.
Arman OKTIаBR,
«Egemen Qazaqstan»
ALMATY
