Mektep oqýshylary kúzgi demalys kezinde ýaqyttaryn tıimdi ótkizip, áskerı qyzmetker bolýdyń qupııasyna qanyqty. Áskerı tehnıkalarmen tanysty, sarbaz botqasynyń dámin tatyp, jeke quramnyń jattyǵýyna da qatysty. Klýb músheleri «Batys» óńirlik qolbasshylyǵy áskerleriniń qolbasshysy, general-maıor Dáýlet Ospanovpen qyzyqty áńgime órbitti.
-Árıne, bir kúnde elimizdiń qarýly kúshteriniń qataryndaǵy qyzmetpen tolyq tanysý múmkin emes, - deıdi D.Ospanov. – Biraq málimet alýǵa bolady. Qazaqstan áskeri jyl sanap jetilip keledi, tehnıka jańardy, jaýyngerlik daıyndyq qarqyny joǵarylady, áskerı qyzmetti óteýge qajetti jaǵdaıdyń bári bar.
Qolbasshylyqtyń baspasóz hatshysy Rústem Igisinov «Batys» óńirlik qolbasshylyǵy jastardy otansúıgishtikke baýlý jumystaryna erekshe kóńil bóletinin aıtady. Jasóspirimderdi qajyrly, qaıratty bolýǵa tárbıelep, áskerı qyzmettiń ımıdjin kóterýge baǵyttalǵan sharalar alǵa qaraı da jalǵasyn tabady.
Baqytgúl BABASh,
«Egemen Qazaqstan».
ATYRAÝ.
