Terezeni jaba bergende ishke serpilgen aýamen yrǵatylǵan torǵyn perde betin sharpydy. Bir tátti kúı keship, salqyn, taza aýany simire ishke tartty. Osy sát uıaly telefon qońyraýy shyldyrlaı jóneldi. О́kshesin kótere, aıaq ushymen ǵana jeńil qadam alyp jatyn bólmege júgirdi. Tósek ústinde telefon tynymsyz bezektep jatyr. Ekranynan áldebir kelisti jigittiń sýreti kórindi. Aqtotynyń júzi bal-bul janyp, ezýine kúlki úıirile ádemi jigittiń júzin bir sıpap jiberip, telefondy qulaǵyna taqady.
– Sálem berdik, kerbez qyz! Kelip qaldyq esigińniń aldyna, – dep áýendete sóıledi daýys.
– Kelip qalsań qutty bolsyn. Kút endi.
– Maıysyp, bet-aýzyńdy syzǵylap otyryp almaı tezdet onda, onsyz da hor qyzynan kem emessiń.
– Eki kóziń tórt bolady áli...
– Tań aǵaryp atqansha shydaýǵa barmyn.
– Jaraıdy, zyryldaı berme, shyǵamyn qazir.
«О́miri kóńildi ózi» dep jymıdy qyz tutqany qoıyp jatyp. Únemi jarasymdy kıinip, jaǵymdy átir seýip júredi, naǵyz seri ǵoı, shirkin... Budan buryn bir-eki jerde kezdeısoq kezdesip qalyp, ázilderi jarasyp ketken. Tez til tabysqandaryna bul da tań... Endi ózin qalaı kútip otyrǵanyn elestetip, ózinen ózi kúlimdep, tezdetip taranyp, sylandy da, kólbiregen ádemi kók kóılektiń syrtynan uzyn etekti, jeńil kúzdik plash kıip, syrtqa qaraı bettedi.
Esik aldyna shyqqanda «Mersedes» avtokóliginiń janynda bir shoq roza ustaǵan jigit qarsy aldy. Betine betin tıgizip, ádeppen amandasty da, kóliktiń esigin ashyp, qurmet ısharasyn jasady. Bar qylyǵy tartymdy, qandaı jaıly jan dep qyz qýanysh sezindi.
Kóliktiń ishinen de jaǵymdy átir ıisi ańqyp tur. Jigit jymıyp «kettik» dedi de, kólik keń kósheni boılap zaýlaı jóneldi. Zymyraǵan kólik, ádemi jigit, qonymdy ázil men jaǵymdy átir ıisi qyz kóńilin masaıratty. Jóndi yrǵaǵy da joq, asyǵys aıtylǵan rep te bul joly onsha jaǵymsyz kóringen joq. Biraq jigittiń únemi rep tyńdaıtynyn endi ǵana baıqaǵan. Osynsha ádemi kóńil kúı men jarasym syılaǵany úshin jigittiń talǵamyna da qurmet qylyp, mýzykany aýystyrýdy talap etken joq, daýryǵyńqyrap ketken dybysty sál báseńdetip qoıdy.
Keshki kósheniń árin keltirip, mańdaıshasyndaǵy qyzyl-jasyl shamdary jaltyldap, sazdy vals áýeni oınaǵan shaǵyn dámhananyń aldyna kelip toqtady. Kók kóılekti jas sulý seri jigitke erkeleı, kúlimdeı qarap, bileginen ustap yrǵala basyp dámhanaǵa endi. Ishten jyly aýamen birge qýyrǵan ettiń, ártúrli tamaqtyń ıisi lap qoıdy. Ekeýi qol ustasqan kúıi ońashalaý ústeldiń birine baryp otyrdy.
Jigit aldymen ózi dámdi, qymbat birneshe taǵamdy atap, qyzǵa kezek berdi. Qyz jigit tańdaǵan tamaqtyń qunyn kórip, ózi de sol shamadaǵy asqa tapsyrys berdi. Jigit júzinen sabyrly jylylyq esip, kóńildi áńgime bastady. Joqty-bardy sóz qylyp, arasynda birneshe márte vals bılep qaıtty. Jigitten taraǵan fransýz átiriniń ıisi qyzdyń sanasyn jaýlap, onan arman qumar etkendeı. Bıi de yrǵaqty, kelisimdi. Myqynyna jaqyndata ustaǵan qarýly qoldyń ystyq taby denesine jaıylyp bara jatady. Ústelge otyrǵanda jigit keıbir ápendi dostarynyń qylyqtaryn aıtyp kúldi, qyz da kúldi. Ishinen óziniń qurbylary arasynan sondaı minezdes qyzdardy izdestire bastady. О́zi jaqyn aralasatyn bir qyz týraly endi áńgime bastaı bergeni sol edi, jigittiń uıaly telefony shyr ete qaldy. Jigit telefonǵa sál qarady da, qyzyl tetikti basyp, ústelge qoıa saldy.
– Ol kim?
– Mańyzdy emes...
Qońyraý qaıta shalyndy. Jigit bul joly da kótermedi. Qyz únsiz otyryp qaldy. Kóp ótken joq, qońyraý taǵy shalyndy.
– Kótere salsańshy endi!
– Joq, eshteńesi joq.
– Kim ol sonsha?
– Jaı, bireý...
– Aıtsańshy...
Qyz qoımady.
– Jaı, bir qyz, buryn aralasyp edik. Endi bári bitkenin túsine almaı júr áli. Habarlaspa desem qoımaıdy...
Qyz úndemedi. Aıtpaq bolǵan áńgimesiniń de keteýi ketkendeı boldy. Endi yrǵaqty, jyldam bılerge arnalǵan dańǵaza mýzykalar oınaı bastapty. Ortadaǵy ashyq alańqaıda bir top qyz, jigit julqyna bılep júr. Qatarlas ústelde úsh jasamys áıel araq iship otyr. О́zge de ýlap-shýlap, qyzara bórtken adamdardyń qarasy kóp sekildi. Dámhananyń tóbesindegi álginde ǵana qosylǵan aınalmaly sham jarq-jurq etip, túrli-tústi jaryqtar shashady. Qyzdyń mazasy kete bastaǵandaı boldy.
– Syrtqa shyǵaıyqshy...
– Ne bop qaldy?
– Mazam ketip, mynaý dańǵaza mýzyka unamaı tur.
– Onda tynyshtaý jerge baraıyq pa?
– Aldymen myna jerden shyǵaıyqshy...
– Jaqsy, men schıotty tóleı salaıyn, syrtta kúte tur.
Qyz taza aýaǵa shyǵyp, tereń tynys aldy. Mezgil tún ortasyna taqaǵan sekildi. Kóshedegi qozǵalys azaıyp, kólikter saıabyrsyp qalǵan. Sonaý bıikten dóńgelenip aı kórindi, árbir tusta bir óship, bir janyp juldyzdar jymyńdaıdy. Kúnde aspanǵa qaraı bermeısiń ǵoı, qandaı ádemi edi. Kókiregin toltyra tereń bir tynys alyp edi, jigit átiriniń ıisi sińip alypty, salqyn túngi aýamen aralasyp ishke endi. Saf aýanyń óz ıisin ıiskeı almaǵanyna renjigendeı tyjyryndy. Kóp keshiktirmeı jigit te shyqty.
– Kettik!
– Qaıda?
– Bir ońasha jer tabaıyq...
– Meni úıge aparyp tastashy.
– Nege?
– Nege dep suramashy, ketkim kelip tur úıge.
– Jaqsy. Kettik onda seniń úıińe...
Jigit áli de baıypty kúıde kólikti qyzdyryp, qan kóshemen ysqyrta jóneldi. Rep qaıta qosyldy. Qyz birden mýzykany óshirip tastady. Ekeýi ún qatpastan qyzdyń úıiniń aldyna kelip toqtady. Qyz asyǵa kólikten tústi.
– Saǵan ne bop qaldy, Aqtoty?
– Eshteńe... taǵy kezdesemiz, saý bol!
Qyz jyldamdatyp úıge qaraı júrdi.
– Ne boldy, Aqtoty? Durystap qoshtasaıyq ta... oý, Aqtoty!
Qyz tez-tez basyp úıine kirip, syrtqy kıimderin sheshti. Tereze jabyq tursa da, syrttan gazyn ókirte basqan kólik gúrili estildi. Aqtoty tereze janyna baryp edi, asfaltqa úıkelgen dońǵalaqtan aq tútek burqyrata qozǵalyp, zymyraı jónelgen súlik qara «Mersedes» kóligin kórdi. Áne-mine degenshe ǵaıyp bolyp úlgerdi.
Sosyn aýyr bir tynys aldy da, tósegine kelip jantaıdy. Jigittiń átir ıisi áli de bilinip turǵan sekildi. Bilegin, qoldaryn, tipti kóılegine deıin ıiskep kórdi. Átir ıisi bárinen shyǵyp tur. Osynsha jaǵymsyz ıis bolar ma eken, qandaı mánsiz! Basy aınalǵandaı, tipti júregi aını bastady.
Ornynan turyp, barlyq kıimin sheship, dýshqa kirip ketti. Qulyn músinin sıpalap, ysqylap uzaq jýyndy. Birde bilekterin ıiskep qoıady. Hosh ıisti sabyndar men ártúrli gelderdi neshe qaıtara jaǵyp, shaıynyp, asyqpaı súrtindi.
Uıaly telefonyna áldeneshe qońyraýlar túsipti. Birneshe sms hattar kelipti, birin de oqyǵan joq. Ásem, yrǵaqty djaz mýzykalaryn qosyp, mamyq tósekke qulaı ketti. О́zi súıip tyńdaıtyn Lýı Armstrong, Net Kıng Koýl, Bıllı Holıdeı, Bennı Gýdmen, Charlı Parker, Oskar Pıterson – birinen keıin biri syrǵı berdi. Ásem áýen terbegen shaǵyn bólmede uzaq oılanyp jatyp, tátti uıqyǵa ketti.
Esbol NURAHMET
