«Bir qyzyǵy, dál sol kezde meni ańshy myltyǵy men adam balasynyń basyna túsken jalǵyzdyqtyń arasyndaǵy tylsym baılanys qyzyqtyryp júrgen-di», degen japon jazýshysynyń pikiri birtúrli qyzyq ári túsiniksizdeý kórindi oǵan.Tap osy sátte uzynnan uzaqqa sozylyp jatqan Ǵaryshkerler alleıasynda bir-birine qarama-qarsy ushyrasa qalǵan eki jasóspirimniń:
«Má-á, búgin seni kórem dep oılaǵan joq em!..»
«Ne-e, meni «ushyp ketti ǵoı» dediń be?!», dep aıǵaılaǵan daýsynan selk ete tústi.
Sart-surt qol alysyp, úsh ret tós túıistirip, yrjalaqtap kúlgen balalardyń qaperine «Ákemizdeı kisi kitap oqyp otyr eken-aý, qarsy aldyna turyp alyp sampyldaǵanymyz jón bolmady ǵoı» degen oı kirip te shyqpady. Kim bilsin, bálkim «Qaıda barsaq ta aldymyzdy oraıtyn «aǵa urpaq» emes pe?!» degen pıǵyl da bolǵan shyǵar.
Kenet qaıdan shyǵa kelgeni belgisiz kip-kishkentaı qanden ıt álgi ekeýine qarap shabalanyp úrip qoıa berdi. Ári-beriden soń tipti ekeýiniń daýsyn bir-birine estirtpeı jiberdi.
«Oı, basqa bir jaqqa keteıikshi», dedi olardyń bireýi.
Sóıtti de ilgeri qaraı júgire jóneldi. Artynsha qanden ıt te ashýyn basyp, áýdem jerde turǵan ıesine qaraı qunjyńdap bara jatty.
Ol endi áldenege tańǵalǵandaı ezý tartyp, basyn shaıqady. «Ańshy myltyǵy men adam balasynyń basyndaǵy jalǵyzdyqtyń arasynda rasynda da bir tylsym baılanys bar shyǵar degen oı keldi. Sebebi álgi qanden ıt te meniń jalǵyzdyǵymdy qorǵap, anaý esersoq eki baladan arashalap qaldy emes pe».
Nurǵalı ORAZ,
«Egemen Qazaqstan»
