Jıynǵa Qazaqstan men shet elderdiń Ulttyq ǵylym akademııalary, ǵylymı zertteý ınstıtýttary men dıplomatııalyq mıssııa basshylary, belgili memleket jáne qoǵam qaıratkerleri men túrkitanýshy ǵalymdar qatysty.
Halyqaralyq túrki akademııasynyń prezıdenti Darhan Qydyráli alqaly jıynnyń Memleket basshysynyń «Bolashaqqa baǵdar: rýhanı jańǵyrý» baǵdarlamasy aıasynda ótkizilip otyrǵanyn jetkizip, atalǵan baǵdarlamadaǵy ulttyq biregeılikti saqtaý, bilimniń saltanat qurýy, sananyń ashyqtyǵy, tarıhqa betburys syndy taqyryptardy túrki álemi úlken qyzyǵýshylyqpen qabyl alǵanyn atap ótti.
«2015 jyly Astanada ótken Túrki keńesiniń V sammıtinde Qazaqstan Prezıdenti Nursultan Nazarbaev túgel túrkiniń rýhanı murasyn jınap, nasıhattaıtyn ortaq joba bastaýdy tapsyrǵan bolatyn. «Atalar mırasy» portaly – sol bastama negizinde iske asyrylǵan irgeli joba. Osydan soń Túrki elderiniń Ulttyq ǵylym akademııalary jáne ádebı ınstıtýttarynyń basshylarymen jınalyp, jobany qalaı júzege asyrýǵa bolatyndyǵy týrasynda aqyldasqan bolatynbyz. Túrkitildes halyqtardyń murasy negizinde 100 tomdyq kitap shyǵarý jóninde de usynys qaraldy. Alaıda dál qazirgi ýaqytta kitap shyǵarý isi, aýdarma jumystary qymbatqa túsetini belgili. Osy oraıda Túrkııa tarapynan mýltımedıalyq qor retinde jasaý boıynsha usynys tústi. Sol kúnnen bastap Halyqaralyq túrki akademııasy arnaıy portal jasaqtaý jumystaryna kirisip ketti», dedi uıym basshysy D.Qydyráli. D.Qydyráliniń aıtýynsha, portaldaǵy aqparattar mektep oqýshysynan bastap ýnıversıtet stýdentterine, jalpy túrki álemine qatysty málimet alǵysy kelgen kez-kelgen izdenýshige jeńildik týǵyzady ári túbi bir túrki jurtyna ortaq mádenı mura ýıkıpedııasy bolmaq.
Halyqaralyq túrki akademııasynyń qyzmetkeri, belgili túrkitanýshy Nápil Bazylhan mýltımedıalyq qordyń jumys isteý tártibine qysqasha sholý jasap, tanystyryp ótti. Onyń aıtýynsha, portalda túrkitildes halyqtardyń, ulystar men etnıkalyq toptardyń ejelgi zamannan búginge deıingi rýhanı muralary toptastyrylǵan. Ǵylymı eńbekterdiń túpnusqalyq transkrıpsııasy, aýdarmasy, fotosýretteri, faksımılesi qatar usynylyp otyr.
«Túrki áleminiń baı murasynyń qory retinde jasalǵan portal qazaq, túrik, aǵylshyn, orys tilinde málimet taratady. Mysaly, Mońǵolııanyń Altaıynda jartastaǵy petroglıf sany 100 myńnan assa, Qazaqstandaǵy tańbalar sany 2 myń shamasynda. Osy sııaqty arnaıy túsiniktemesimen júktelgen túrki álemine ortaq muralardy atalǵan portaldan ońaı kórýge bolady», deıdi N.Bázilhan.
Portaldaǵy derekter taqyrybyna qaraı túrki halyqtarynyń jazý tarıhy, ejelgi jazba muralary, eóne túrik bitik jazýlary, halyq qazynasy, ortaq jazba ádebıet nusqalary, ulttyq ádebıet úlgileri, arheologııalyq eskertkishter, etnografııalyq jádigerler jáne gazet-jýrnaldar atty toǵyz bólimge jınaqtalǵan. Aldaǵy ýaqytta akademııa portaldy ǵylymı-tanymdyq aqparattarmen udaıy tolyqtyryp otyrady.
Aıa О́MIRTAI,
Cýretti túsirgen Erlan OMAR,
«Egemen Qazaqstan»
