Foto: Aıbatyr NURASh
Elbasymyz «100 naqty qadam» Ulttyq josparynda medıatorlar qyzmeti halyqtyń barlyq tobyna qoljetimdi bolýyn tapsyrǵan bolatyn. Oralda qanat qaqqan joba dál osy maqsatty kózdegen.
Batys Qazaqstan oblystyq sotynyń tóraǵasy Bek Ámetovtiń aıtýynsha, jańa jobanyń nátıjesinde azamattardyń medıator qyzmetine júginýine barlyq jaǵdaı jasalady, ymyraǵa kelý sharttarynyń aıasy keńeıip, sot shyǵyndary únemdeledi, halyq ishinde daý-damaıdy sotqa deıin-aq sheshýge múddelilik artady.
Jańa jobany tanystyrǵan «logitex» JShS menedjeri Anton Skramovskıı baǵdarlama eki kezeńnen turatynyn aıtady. Birinshi kezeńde elektrondy servıs qyzmeti Oral qalasyndaǵy №1 Halyqqa qyzmet kórsetý ortalyǵynda iske qosylady. Oǵan tek HQKO qyzmetkeri jáne medıator ǵana kire alady. Medıator ol jerden «jeke kabınet» ashyp qoıady. Shaǵymdanýshy azamat HQKO-ǵa kelip, ótinishin avtomattandyrylǵan júıe arqyly tapsyrady. Shaǵymdy medıatorlardyń biri qabyldaǵan sátte, álgi azamat sol medıatordyń qabyldaýyna jazylyp qalady. Sóıtip, ótinish berýshige shaǵymynyń qabyldanǵany, medıatordyń aty-jóni men mekenjaıy, qabyldaıtyn ýaqyty kórsetilgen talon beriledi. Bul qyzmettiń odan ári jemisti bolýy shaǵymdanýshy men medıatordyń ózderine baılanysty bolady.
Ekinshi kezeń 2018 jyldan bastalady. Keler jyly portal qurý arqyly bul qyzmetti barlyq azamattar úshin qoljetimdi etý josparlanǵan. Bólmeniń siltemesine kirý arqyly paıdalanýshy medıasııa týraly materıaldarmen tanysyp, medıatorlar tizimin, jumys kestesin, pikirlerdi jáne medıatordyń jumys tájirıbesin t.b. kórip, tanysa alady. Servıs bolashaqta derbes gadjetter men smartfondarda júktep alýǵa bolatyn mobıldik qosymshasyn iske qospaq.
Bul jańalyq eń aldymen halyqtyń medıator izdeýge ketetin ýaqyty men qarjysyn únemdeıdi, qujat jınaý mashaqatynan qutqaryp, sottyń da aldyn alýy múmkin. Medıasııany usaq jáne ortasha aýyr qylmystyq isterge de qoldanýǵa bolady.
Qazir jańa tehnologııa tirshiliktiń barlyq salasyna enip jatyr. Bul ómir talaby, osy arqyly biz ómir sapasyn kóterýge tıispiz. Demek, osyndaı jobanyń arqasynda azamattar máselesin tez, tıimdi jáne kóp shyǵynsyz sheshýge múmkindik alady. Keleshekte turǵyndar daý-damaıdy ádettegideı sotta emes, medıator qyzmetin paıdalaný arqyly sheshýdiń qanshalyq yńǵaıly jáne tıimdi ekenine kóz jetkizedi.
«Qazaqstanda jyl ótken saıyn medıatordyń qatysýymen sheshiletin isterdiń sany ósip keledi. Bizdiń qoǵamda kez kelgen janjaldy sheshýdiń eń tabıǵı tásili – dıalog pen ymyraǵa kelý bolýy tıis» deıdi joba avtorlary.
Qazbek QUTTYMURATULY,
«Egemen Qazaqstan»
