«Qymbatty balalar! Barshamyz asyǵa kútetin jarqyn mereke - jańa jylǵa sanaýly kúnder qaldy. Men senderdi kele jatqan jańa jylmen shyn júrekten quttyqtaımyn! Bul senderdiń merekeleriń - qyzyqty sátterdiń, ertegiler men syılyqtardyń kezi. Barlyǵyń jaqsy oqyp, sporttyq jetistikterge jetip, qaıyrymdy ister jasap, jańa jyldyq merekege eńbek sińirdińder dep oılaımyn. Jańa jylda bári basqasha bolady, jańa tabystarǵa qol jetkizip, jańa bilimdi ıgeresińder. Bul rette otbasyńa degen mahabbatty, dostarǵa degen adaldyqty, ustazdarǵa degen qurmetti jáne elińe degen súıispenshilikti saqtap qalý kerek», - dedi N.Nazarbaev elordadaǵy Oqýshylar saraıynda ótken «Asqaq ordam - Astana» Jańa jyl merekesindegi beınequttyqtaýda.
Prezıdent balalar úshin barlyq múmkindikterdiń qoljetimdi ekenin erekshe atap ótti. «Bizdiń elimiz jyldan-jylǵa qaryshtap damyp, senderge ǵalamat bolashaq syılaý úshin jańa maqsattardy baǵyndyryp keledi. Dál osy ýaqytta ósip kele jatqan sender - baqytty urpaqsyńdar. Sender úshin barlyq jol ashyq, bar armandaryń oryndalady. Aınalaıyn balalar! Jańa jylda bárińe mol ıgilik pen jarqyn bolashaq tileımin. Balalyq shaqtaryń bazarly, ómirleriń ajarly bolsyn! Jańa jylda armandaryń oryndalyp, Táýelsiz elimizben birge ósip-órkendeı berińder», - dedi Prezıdent.
Aıta keteıik, elordadaǵy Oqýshylar saraıynda ótken merekelik baǵdarlamaǵa ertegi álemindegi keıipkerlerdiń qatysýymen shoý-qoıylymdar ótti. Sharaǵa 200 bala qatysty.
