Jıyn barysynda Elbasy Almatyda ótken 2017 jylǵy Dúnıejúzilik qysqy ýnıversıada men «EKSPO-2017» kórmesi kezinde aýqymdy sharalarǵa jumsalǵan shyǵyndar týraly jáne salǵan ınvestısııanyń qanshalyqty aqtalǵandyǵy týraly qoıylǵan jýrnalıstiń saýalyna jaýap berdi.
Memleket basshysy árdaıym jańa bastamanyń ońaıshylyqpen iske aspaıtynyn, alaıda iri sporttyq shara daıyndaýdaǵy ınfraqurylymdyq baza qyzmetiniń búginde el qajetine jarap otyrǵanyn atap ótti.
«Mundaı synı suraqtarǵa jaýap izdeıtin bolsań, maqsatty ysyryp qoıyp jaýap berýmen ótesiń. Astanany kóshiremiz degende de osylaı bolǵan. Al qazir mıllıon turǵyny bar qalada ómir súrip otyrsyzdar. Osy sııaqty jańa bastamany engizý ońaıshylyqpen iske asa qoımaıdy. Ýaqyt ótedi, kóredi, sezedi, sodan soń moıyndaıdy. Árıne, shyǵyndandyq. 2 mıllıon turǵyny bar Almaty úshin ýnıversıadany burynnan salǵym kelgen. Alyp muz aıdyny men sport keshenderi kerek-aq. Ýnıversıada kezinde 1700-den astam páter salyndy, qazir sonyń barlyǵy almatylyq muqtaj otbasylarǵa berildi. Sport keshenderi iske qosylǵannan keıin qaladaǵy qysqy sport túrine qyzyǵýshylyq 60 paıyzǵa artqan», degen Prezıdent sportty bilim berý júıesiniń mańyzdy elementteriniń biri retinde jastar arasynda úlken qyzyǵýshylyqqa ıe bolǵanyn atady.
Eske sala ketsek, Ýnıversıadany Almatyda ótkizý týraly resmı sheshim 2011 jylǵy 29 qarashada Brıýsselde Halyqaralyq ýnıversıtettik sport federasııasynda (FISU) ótken daýys berý nátıjesinde qabyldandy. Osylaısha, Almaty burynǵy keńestik keńistik elderiniń ishinde birinshi bolyp, 2017 jyly ótetin XXVIII qysqy Ýnıversıadanyń astanasyna aınaldy.
