Jalpy, Ospanáli Imanalıev ádebıettiń poezııa, proza jáne satıra janrynda eńbek etken qalamger. Onyń «Baıqadam», «Ylǵalsyz kóktem», «Aq qaıyń jardy búrshigin» jáne taǵy da basqa kitaptary kezinde oqyrman qaýymnan laıyqty baǵasyn alǵan. Eske alý keshinde qalamgerdiń kózin kórgen zamandastary ol týraly estelikter aıtyp, rýhyna taǵzym etti. Sodan keıin aqynnyń sózine jazylǵan Eskendir Hasanǵalıevtiń «Anaǵa sálem» ánin qosyla shyrqaǵan kópshilik perzentine degen saǵynyshyn jetkizdi.
Jazýshynyń mereıtoıyna oraı «Ospanáli Imanalıev» atty kitap jaryq kórgen bolatyn. Aqkól aýylynan bastaý alǵan mádenı shara Taraz qalasyndaǵy Jambyl atyndaǵy «Rýhanııat» ortalyǵynda jalǵasty. Atalǵan kitaptyń tusaýkeser rásimi ótip, jazýshynyń jary Raýshan apaı men jazýshy-dramatýrg Elen Álimjan kitaptyń tusaýyn kesti. Sonymen qatar kezinde Talas aýdanynda basshylyq qyzmetter atqaryp, jazýshymen jaqsy qarym-qatynasta bolǵan Baltabaı Bekejanov, Esenaman Beıseýov, Qarjaýbaı Kemelov jáne basqa da azamattar estelikter aıtsa, jazýshynyń qaryndasy Amankúl Dáýletáliqyzy men inisi Jeksen Qurmanáliuly qalamger rýhyna taǵzym etken kópshilikke alǵysyn bildirdi.
Hamıt Esaman,
«Egemen Qazaqstan»
Jambyl oblysy
